होमिओपथी डॉक्टरांच्या नोंदणीचा निर्णय रद्द

होमिओपॅथी डॉक्टरांच्या
नोंदणीचा निर्णय रद्द
महाराष्‍ट्र वैद्यकीय परिषदेची घोषणा; आयएमएच्या लढ्याला यश
सकाळ वृत्तसेवा
मुंबई, ता. ११ : इंडियन मेडिकल असोसिएशनच्या (आयएमए) विरोधानंतर महाराष्‍ट्र वैद्यकीय परिषदेने होमिओपॅथीच्या डॉक्टरांना ॲलोपॅथी उपचार करण्याची परवानगी देण्याच्या निर्णयावरून माघार घेतली. परिषदेने शुक्रवारी (ता. ११) सीसीएमपी होमिओपॅथी डॉक्टरांच्या नोंदणी करण्याचा निर्णय रद्द केल्याचे अधिकृत पत्रक जारी केले. १५ जुलैपासून या नोंदणीला सुरुवात होणार होती. ‘आयएमए’ने या निर्णयाला विरोध करून तो रद्द करण्यासाठी केलेल्या पाठपुराव्‍याला अखेर यश आले आहे.

सीसीएमपी (सर्टिफाइड कोर्स इन मॉडर्न फार्माकॉलॉजी)
कोर्स केलेल्या होमिओपॅथिक डॉक्टरांना महाराष्ट्र मेडिकल कौन्सिलकडे नोंदणी करण्याची मुभा देण्याचा निर्णय घेण्यात आला होता. गुरुवारी रात्री मुख्यमंत्री देवेंद्र फडणवीस यांच्याशी वर्षा बंगल्यावर बैठक झाली. मंत्री सुधीर मुनगंटीवार यांच्या सहकार्याने आयएमएच्या कार्यकारिणी सदस्य डॉ. मंगेश गुलवाडे व डॉ. राजू अल्लूरवार यांच्या पुढाकाराने ही बैठक झाली. या बैठकीला आयएमएचे महाराष्ट्र अध्यक्ष डॉ. संतोष कदम, सचिव डॉ. अनिल आव्हाड, डॉ. शिवकुमार उत्तुरे उपस्थित होते. मुख्यमंत्र्यांनी आयएमएच्या निवेदनाची दखल घेऊन तत्काळ मुख्य सचिव धीरजकुमार आणि महाराष्‍ट्र वैद्यकीय परिषदेचे प्रशासक डॉ. विंकी रुघवानी यांच्याशी चर्चा करून कार्यवाहीचे आदेश दिले.
विधान परिषदेचे विरोधी पक्षनेते अंबादास दानवे यांनी अधिवेशनात सीसीएमपी कोर्सधारक होमिओपॅथी डॉक्टरांच्या एमएमसी नोंदणीविरोधातील मुद्दा अधिवेशनात मांडला होता. त्यांनी एमएमसी निवडणुका अनेक वर्षांपासून प्रलंबित असल्याचेदेखील अधोरेखित केले.

-----
एमएमसी निवडणुकांच्या वेळेवर आयोजन, नियमांचे कठोर पालन आणि आधुनिक वैद्यकीय व्यवसायाच्या हक्कांच्या रक्षणासाठी
आयएमए कटिबद्ध आहे. या लढ्यामुळे महाराष्ट्रातील सर्वसामान्य जनतेला गुणवत्तापूर्ण वैद्यकीय सेवा मिळेल.
- डॉ. संतोष कदम, अध्यक्ष, आयएमए महाराष्ट्र राज्य
....
पालिका रुग्णालयांचा पाठिंबा
या निर्णयाविरोधात पालिकेच्या सायन, केईएम, नायर रुग्णालयातील डॉक्टरांनीही दिवसभर काळ्या फिती लावून पाठिंबा दिला.