कोळी समाजाच्या उदरनिर्वाहावर गदा!

कोळी समाजाच्या उदरनिर्वाहावर गदा!
गिरगाव चौपाटीवरील बोटींना हटवण्याचे आदेश
सकाळ वृत्तसेवा
मुंबई, ता. १२ : गिरगाव चौपाटीवर मासेमारी करणाऱ्या कोळी समाजाच्या बोटींना हटवण्याचा आदेश दिल्याने मोठा वाद निर्माण झाला आहे. मुंबई शहराच्या मत्स्यव्यवसाय सहाय्यक आयुक्त कार्यालयाने शुक्रवारी (ता. ११) दिलेल्या नोटिशीमध्ये चौपाटीवर असलेल्या मासेमारी बोटींना त्वरित हटवण्यास सांगण्यात आले आहे. अशा प्रकारच्या नोटिसा इतर बोटमालकांनाही दिल्‍या आहेत. त्‍यामुळे कोळी समाजाच्या उदरनिर्वाहावर गदा येईल, अशी भीती व्यक्त करण्यात येत आहे.
गिरगाव चौपाटी हा केवळ पर्यटनस्थळ नसून, शतकानुशतकांपासून मासेमारी करणाऱ्या कोळी समाजाचे प्रमुख उदरनिर्वाहाचे साधन आहे. मुंबई शहराच्या मूळ वसाहतींमध्ये मोडणाऱ्या या परिसरात, कोळी समाजाचे अस्तित्व हे शहराच्या इतिहासाचा अविभाज्य भाग आहे. या भागातील कोळी समाजाने समुद्रकिनारी आपला पारंपरिक व्यवसाय आणि संस्कृती जतन केली आहे; मात्र प्रशासनाच्या या कारवाईमुळे पुन्हा एकदा मूळ रहिवाशांच्या विस्थापनाचा मुद्दा उफाळून आला आहे. स्थानिक कोळीबांधवांनी संताप व्यक्त करीत ही कारवाई म्हणजे मराठी कोळी समाजाला गिरगाव चौपाटीवरून हद्दपार करण्याचा प्रयत्न आहे, असा आरोप केला आहे.
वॉचडॉग फाउंडेशनचे प्रमुख गॉडफ्रे पिमेंटा यावरून सरकारच्या भूमिकेवर प्रश्न उपस्थित केला आहे. स्थानिक नेते आणि सामाजिक संघटनांनी तातडीने हस्तक्षेप करून कारवाई थांबवण्यासाठी पावले उचलली पाहिजेत, अशी मागणीही त्‍यांनी केली आहे.

राज्य सरकार मुंबईच्या मूळ कोळी समाजाला हटवण्यासाठी भूमिका घेत आहे. पर्यटनाच्या नावाखाली स्थानिकांचा व्यवसाय आणि संस्कृती उद्ध्वस्त केली जात आहे.
- गॉडफ्रे पिमेंटा, प्रमुख, वॉचडॉग फाउंडेशन