रोहित पवार यांच्याविरुद्ध आरोपपत्र

रोहित पवार यांच्याविरुद्ध आरोपपत्र

शिखर बँक आर्थिक गैरव्यवहाराचे प्रकरण

सकाळ वृत्तसेवा
मुंबई, ता. १२ : महाराष्ट्र राज्य सहकारी बँक (एमएससीबी) घोटाळ्याशी संबंधित आर्थिक गैरव्यवहारप्रकरणी सक्तवसुली संचालनालयाने (ईडी) नुकतेच विशेष न्यायालयात आरोपपत्र दाखल केले आहे. या आरोपपत्रात राष्ट्रवादी काँग्रेसचे (शरद पवार गट) आमदार रोहित पवार यांचा समावेश आहे.

शिखर बँकेचे तत्कालीन अधिकारी आणि संचालकांनी योग्य प्रक्रिया न करता त्यांच्या नातेवाइकांना, खासगी व्यक्तींना कवडीमोल किमतीत सहकारी साखर कारखाना विकल्याचा तपास यंत्रणेचा आरोप आहे. याप्रकरणी ईडीने रोहित पवार यांची यापूर्वी दोन वेळा चौकशी केली होती. ईडीच्या आरोपांनुसार कन्नड सहकारी साखर कारखाना हा रोहित पवार यांच्या बारामती अ‍ॅग्रो लिमिटेडच्या मालकीचा आहे. कन्नड सहकारी साखर कारखान्याचे ८०.५६ कोटी रुपयांचे थकीत कर्ज वसूल करण्यासाठी शिखर बँकेने १३ जुलै २००९ रोजी सरफेसी कायद्यानुसार त्यांच्या सर्व मालमत्ता ताब्यात घेतल्या. त्यानंतर एमएससीबीने ३० ऑगस्ट २०१२ रोजी एका कथित मूल्यांकन अहवालाच्या आधारे अत्यंत कमी किंमत निश्चित करून कन्नड सहकारी साखर कारखान्याचा लिलाव केला. त्यात बारामती अ‍ॅग्रो लिमिटेडव्यतिरिक्त इतर दोन पक्ष बोली प्रक्रियेत सहभागी झाले. सर्वाधिक बोली लावणाऱ्या बोलीला तांत्रिकदृष्ट्या कमकुवत कारणांमुळे अपात्र ठरवण्यात आले, तर दुसरी बोली लावणारा व्यावसायिक बारामती अ‍ॅग्रो लिमिटेडशी संबंधित होता आणि त्याची साखर कारखाना चालवण्याची कोणतीही आर्थिक क्षमता अथवा त्याचा कोणताही अनुभव नसल्याचा ईडीचा आरोप आहे.

ऑगस्ट २०१९मध्ये मुंबई पोलिसांच्या आर्थिक गुन्हे शाखेने याप्रकरणी गुन्हा दाखल केला होता. त्याआधारे ईडीने याप्रकरणी तक्रार नोंदवून चौकशी सुरू केली होती. त्यानंतर ईडीने नुकतेच विशेष न्यायालयात याप्रकरणी आरोपपत्र दाखल केले.