मुख्यमंत्र्यांच्या हस्ते ‘ब्राइट बस’चे उद्‌घाटन

मुख्यमंत्र्यांच्या हस्ते
‘ब्राइट बस’चे उद्‌घाटन

डिजिटल साक्षरतेसाठी अभिनव पाऊल

सकाळ वृत्तसेवा
मुंबई, ता. १२ : मुख्यमंत्री देवेंद्र फडणवीस यांच्या हस्ते विधानभवनात ‘ब्राइट बस’ या डिजिटल साक्षरता व महिला सक्षमीकरण उपक्रमाचे उद्‍घाटन करण्यात आले. आमदार प्रसाद लाड यांच्या ‘मी मुंबई अभियान अभिमान प्रतिष्ठान’तर्फे हा उपक्रम सुरू करण्यात आला आहे.

‘ब्राइट बस’ ही एक वातानुकूलित, अत्याधुनिक डिजिटल मोबाईल क्लासरूम आहे. प्रोजेक्टर, टीव्ही, ध्वनीप्रणाली आणि २० संगणकांसह सुसज्ज आहे. सकाळी ही बस शाळांमध्ये फिरता वर्ग म्हणून, तर दुपारी जनसुविधा केंद्र म्हणून काम करेल. विद्यार्थ्यांना डिजिटल साक्षरतेचे प्रशिक्षण आणि नागरिकांना आधार सेवा, सरकारी योजनांची माहिती व फॉर्म भरण्याची मदत यामध्ये मिळणार आहे.

या उपक्रमाची सुरुवात मुंबईतील पाच पालिका शाळांमध्ये होत असून, शिक्षण, तंत्रज्ञान आणि सेवा वंचित व गरजू लोकांपर्यंत पोहोचवणे हा मुख्य उद्देश आहे. या बसमधून सामुदायिक कार्यशाळा, कथाकथन सत्रे, डिजिटल कौशल्य विकास व जनजागृती मोहिमादेखील राबवण्यात येणार आहेत. क्रॉक्स इंडिया आणि टीएसएल फाउंडेशन यांचा उपक्रमात सक्रिय सहभाग आहे.
----
ब्राइट बस हे केवळ शैक्षणिक वाहन नसून, शेवटच्या घटकापर्यंत विकास पोहोचवण्याचा आमचा संकल्प आहे.
- प्रसाद लाड, आमदार