निवृत्त अधिकाऱ्याची फसवणूक

११ लाखांची फसवणूक
मुंबई : एअर इंडियाच्या निवृत्त उप संचालकास सायबर भामट्यांनी फसव्या शेअर ट्रेडिंग ॲपद्वारे ११ लाखांचा गंडा घातला. याप्रकरणी सायबर पोलिस ठाण्यात (मध्य विभाग) गुन्हा दाखल करण्यात आला आहे. गेल्या महिन्यात तक्रारदाराने फेसबुकवर भरघोस नफा मिळवून देणाऱ्या शेअर ट्रेडिंग ॲपची जाहिरात पाहिली. त्यावर क्लिक करताच भामट्यांनी केलेल्या व्हॉट्सॲप समूहावर ते जोडले गेले. दरम्यान, ह्या समूहावर विश्वास बसल्याने त्यांनी दोन टप्प्यांत गुंतवणूक केली. दरम्यान, त्यावर झालेला नफा काढून घेण्याचा प्रयत्न केला असता, त्यांना आणखी १० लाख रुपये भरण्यास सांगितले. तेव्हा फसवणूक सुरू असल्याचे लक्षात येताच त्यांनी तक्रार दिली, असे पोलिसांकडून सांगण्यात आले.