महाराष्ट्रातील बार सोमवारी बंद

महाराष्ट्रातील बार सोमवारी बंद
उत्पादन शुल्कातील वाढीविरोधात एल्गार
सकाळ वृत्तसेवा
मुंबई, ता. १२ : उत्पादन शुल्कात केलेली तब्बल ६० टक्के वाढ आणि भारतीय बनावटीच्या विदेशी मद्याच्या विक्रीवरील अतिरिक्त १० टक्के कर तसेच वार्षिक परवाना शुल्कात १५ टक्के दरवाढीच्या विरोधात राज्यातील बारचालकांनी सोमवारी (ता. १४) बंदची घोषणा केली आहे. या बंदला हॉटेल अँड रेस्टॉरंट असोसिएशनने (एचआरएडब्ल्यूआय) पाठिंबा जाहीर केला आहे.
महाराष्ट्रातील आदरातिथ्य क्षेत्र आधीच अनेक अडचणींना सामोरे जात आहे. उत्पादन शुल्कात केलेल्या तब्बल ६० टक्क्यांच्या वाढीविरोधात तसेच इंडियन मेड फॉरेन लिकरच्या एफएल ३ आउटलेट्सवरील विक्रीवर १० टक्के लावणे आणि चालू आर्थिक वर्षासाठी वार्षिक परवाना शुल्कात १५ टक्क्यांनी वाढ करण्याच्या निर्णय योग्य नाही. हा बंद म्हणजे आमचा ‘सामूहिक आक्रोश’ आहे. सरकारने हा निर्णय पुन्हा विचारात घ्यावा आणि आर्थिक स्थैर्य, रोजगार आणि व्यवसायसुलभता यांचा विचार करून योग्य पावले उचलावीत, अशी आम्ही मागणी करतो, असे ‘एचआरएडब्ल्यूआय’चे अध्यक्ष जिम्मी शॉ म्हणाले. या आंदोलनाला महाराष्ट्रातील प्रमुख हॉटेल व रेस्टॉरंट असोसिएशन्सकडून पाठिंबा मिळाला आहे.