राज ठाकरे घेणार मनसैनिकांसाठी गुप्त शिबिर!

राज ठाकरेंचे मनसैनिकांसाठी गुप्त शिबिर
मुंबई, ता. १२ : महाराष्ट्र नवनिर्माण सेनेचे अध्यक्ष राज ठाकरे यांनी पक्षातील प्रमुख नेत्यांसह पदाधिकाऱ्यांना एका अत्यंत गोपनीय मोहिमेसाठी सोमवारी (ता. १४) सकाळी १० वाजता बोलावले आहे. पक्षाचे नेते, विभाग आणि उपविभागप्रमुख यांना पुरेशी कपड्यांची बॅग घेऊन तयार राहण्याचे निर्देश देण्यात आले आहेत.
सध्या ही गुप्त मोहीम केवळ मुंबईतील पदाधिकाऱ्यांसाठी आहे. दादर येथील मनसेचे मुख्यालय असलेल्या राजगड कार्यालयातून बसने नेऊन इगतपुरी येथील एका फार्महाउसवर शिबिर आयोजित केल्याची माहिती समोर येत आहे. या शिबिरात आगामी मुंबई महापालिका निवडणूक, मराठी अस्मिता, आणि उद्धव बाळासाहेब ठाकरे यांच्या शिवसेनेसोबत संभाव्य युती यावर राज ठाकरे आपले धोरण स्पष्ट करतील, अशी शक्यता वर्तवली जात आहे. तीन दिवसांच्या मार्गदर्शनानंतर बुधवारी (ता. १६) सायंकाळपर्यंत सर्वांना पुन्हा मुंबईत आणणार आहेत; मात्र याबाबत कुणाशीही वाच्छता करण्यासदेखील मनाई करण्यात आली आहे.