हवामानामुळे मुंबईकरांना विषाणूजन्य तापाचा त्रास

हवामानामुळे मुंबईकरांना विषाणूजन्य तापाचा त्रास
खासगी आणि महापालिका दवाखान्यांमध्ये रुग्णांची वाढती रांग
सकाळ वृत्तसेवा
मुंबई, ता. १३ : मुंबईत पावसाळ्यातील आजार झपाट्याने वाढत आहेत. गेल्या एका आठवड्यापासून महानगरात कधी पाऊस, तर कधी कडक उन्हाचा अनुभव येत आहे. हवामानातील चढ-उतारांचा मुंबईकरांच्या आरोग्यावर परिणाम होत आहे. मोठ्या संख्येने लोक सर्दी, खोकला आणि विषाणूजन्य तापाला बळी पडत आहेत. त्यामुळे खासगी आणि महापालिकेच्या दवाखान्यांमध्ये रुग्णांची गर्दी होत आहे.
महापालिकेच्या आरोग्य विभागाच्या एका वरिष्ठ अधिकाऱ्याने सांगितले की, प्रत्येक आपला दवाखान्यात दररोज ६० ते ७० रुग्ण येतात. या सर्व रुग्‍णांना ताप, सर्दी आणि खोकल्याचा त्रास होता.

सर्दी-खोकल्याच्या तक्रारी वाढल्या
डॉ. दीपक बैद म्हणाले की, बदलत्या हवामानामुळे रुग्णालयांमध्ये रुग्णांची संख्या वाढत आहे. अनेक लोक सर्दी, खोकला आणि तापाच्या तक्रारी घेऊन येत आहेत.

मुलांच्या आरोग्यावरही परिणाम
जे. जे. रुग्णालयाच्या एका वरिष्ठ डॉक्टरने सांगितले की, हवामानातील चढ-उताराचा मुलांच्या आरोग्यावर परिणाम होत आहे. मोठ्या संख्येने मुले विषाणूजन्य तापाला बळी पडत आहेत. ओपीडीमध्ये उपचारासाठी येणाऱ्या प्रत्येक दोन मुलांपैकी एकाला खोकला आणि सर्दी असल्याची तक्रार असते.
सामान्य चिकित्सक डॉ. झुबैर खान म्हणाले की, झोपडपट्टी भागात विषाणूजन्य तापाचे अधिक रुग्ण आढळत आहेत. तापासोबतच लोक घसा खवखवणे आणि सर्दी होण्याची तक्रार करत आहेत. विशेषतः वृद्धांना जास्त त्रास होतो. डॉ. खान म्हणाले की, अशा हवामानात लोकांनी काळजी घ्यावी.

अशी घ्‍या आरोग्‍याची काळजी...
-शक्य तितके गरम पाणी प्या
-घर सोडताना मास्क वापरा
-सर्दी आणि खोकला असलेल्या रुग्णांनीदेखील मास्क वापरावा, जेणेकरून संसर्ग इतरांना पसरू नये.
- प्रतिकारशक्ती राखण्यासाठी उबदार आणि पौष्टिक आहार घ्‍या.