मेट्रो-१ वरील प्रवाशांची कोंडी फुटणार

मेट्रो-१ वरील प्रवाशांची कोंडी फुटणार
गर्दीच्यावेळी घाटकोपर-अंधेरी यादरम्यान अतिरिक्त फेऱ्या चालवण्याच्या हालचाली; लाखो प्रवाशांना दिलासा
सकाळ वृत्तसेवा
मुंबई, ता. १३ : मेट्रो-१ घाटकोपर-वर्सोवा मार्गावर दररोज साडेचार लाख प्रवासी प्रवास करत असून, त्यांची सातत्याने कोंडी होती. तसेच काही तांत्रिक बिघाड झाल्यास घाटकोपर, अंधेरी, साकीनाका अशा प्रमुख स्थानकांमध्ये प्रचंड गर्दी होती. त्यामुळे प्रवाशांची होणारी गैरसोय टाळण्यासाठी या मार्गावर घाटकोपर-अंधेरी यादरम्यान गर्दीच्यावेळी अतिरिक्त पर्यायी शॉर्ट-लूप फेऱ्या चालवण्याच्या हालचाली मुंबई मेट्रो वन प्रायव्हेट लिमिटेडने (एमएमओपीएल) सुरू केल्या आहेत. त्यामुळे येथील प्रवाशांना मोठा दिलासा मिळू शकणार आहे.
मुंबईतील पहिली एलिव्हेटेड मेट्रो अशी ओळख असलेल्या घाटकोपर-वर्सोवा या सुमारे १२ किलोमीटर लांबीच्या मार्गावर सकाळी साडेपाच ते रात्री ११.५० या वेळेत दररोज ४३० मेट्रो फेऱ्या चालवल्या जातात. तीन मिनिटे २० सेकंदाच्या अंतराने एक गाडी धावत असल्याने साडेचार-पाच लाख प्रवासी दररोज प्रवास करतात. त्यामुळे सकाळी आणि सायंकाळी अंधेरी-घाटकोपर यादरम्यान मोठ्या प्रमाणात गर्दी असते. तसेच तांत्रिक किंवा अन्य कारणांमुळे काहीवेळ मेट्रोसेवा खंडित झाल्यास प्रवाशांची कोंडी होत असून, गर्दीचा सामना करावा लागतो. त्यामुळे गर्दीच्यावेळी घाटकोपर आणि अंधेरी स्थानकादरम्यान पर्यायी शॉर्ट-लूप फेऱ्या चालवण्याबाबत विचार करत असल्याची माहिती एमएमओपीएलच्या सूत्रांनी दिली.

गर्दी नियंत्रणावर भर
घाटकोपर-वर्सोवा मेट्रो मार्गावर घाटकोपर-अंधेरी यादरम्यान मोठ्या प्रमाणत गर्दी असते. तुलनेने वर्सोवा, डीएन नगर आणि आझाद नगर या स्थानकातील प्रवाशांची संख्या कमी आहे. त्यामुळे दर तीन मिनिटे २० सेकंदाने एक गाडी चालवली जात असल्याने अनेकदा या टप्प्यात गाड्यांमध्ये तुरळक प्रवासी असतात. त्यामुळे घाटकोपर-अंधेरी या टप्प्यात जास्तीच्या शॉर्ट-लूप फेऱ्या चालवल्यास येथील गर्दी नियंत्रणात येऊ शकणार आहे, मात्र अंधेरी-वर्सोवा या टप्प्यातील फेऱ्यांमधील वेळ वाढण्याची शक्यता आहे. त्यामुळे प्रवाशांकडून काय प्रतिक्रिया येऊ शकते त्याची चाचपणी मेट्रो प्रशासनाकडून सुरू आहे. मेट्रो मार्गावरील गर्दी कमी करण्यासाठी गाड्यांची संख्या वाढवणे किंवा डबे वाढवणे हाही पर्याय आहे. त्याबाबत मेट्रोकडून चाचपणी सुरू असून, नव्या डब्यांच्या खरेदीसाठी मंजुरी मिळावी म्हणून कर्जपुरवठादारांकडे पाठपुरावा सुरू असल्याचेही मेट्रोच्या एका अधिकाऱ्याने सांगितले.

- दैनंदिन प्रवासी - ४.५ ते ५ लाख
- दैनंदिन फेऱ्या - ४३०
- गर्दीच्यावेळी ३.२० मिनिटाला एक गाडी धावते, तर एरवी ७ मिनिटाला एक गाडी
------------