अवयवदानाने ४ जणांना जीवनदान

अवयवदानाने चार जणांना जीवनदान
सकाळ वृत्तसेवा
मुंबई, ता. १३ : शहरात अवयवदानाप्रती वाढती जागरूकता आणि मानवी संवेदनशीलतेचे उदाहरण सादर करताना शनिवारी (ता. १२) आणि रविवारी (ता. १३) दोन महिलांच्या मृत्यूनंतर त्यांच्या नातेवाइकांनी त्यांचे अवयवदान केले आणि अनेकांना जीवनदान दिले. दोन्ही दात्यांच्या अवयवदानामुळे चार जणांना नवीन जीवनाची भेट मिळणार आहे.
झोनल ट्रान्सप्लांट कोऑर्डिनेशन कमिटीकडून मिळालेल्या माहितीनुसार, ४७ वर्षीय महिलेने मुंबईतील पी. डी. हिंदुजा रुग्णालयात अवयवदान केले. तिने दान केलेल्या अवयवांमध्ये यकृत आणि दोन्ही किडनी यासोबतच कॉर्निया (डोळे)देखील दान करण्यात आले, ज्यामुळे अंधांना दृष्टी मिळण्याची शक्यता आहे. दरम्यान दुसऱ्याच दिवशी रविवारी अंधेरी येथील कोकिलाबेन रुग्णालयात ५० वर्षीय महिलेने मरणोत्तर आपले यकृत दान केले. या दोन्ही प्रकरणांमध्ये, कुटुंबातील सदस्यांच्या संमती आणि संवेदनशीलतेमुळे अनेक रुग्णांना जीवनाची नवीन संधी मिळाली आहे. यासह या वर्षी मुंबईत अवयवदानाची संख्या २९वर पोहोचली आहे.