लिफ्ट शाफ्टमध्ये कोसळून एकाचा जागीच मृत्यू

लिफ्ट शाफ्टमध्ये कोसळून एकाचा जागीच मृत्यू

सकाळ वृत्तसेवा
मुंबई, ता. १३ : वडाळ्यातील मातोश्री सदन या इमारतीच्या लिफ्ट शाफ्टमध्ये पाचव्या मजल्यावरून कोसळून रहिवासी जागीच ठार झाला. ही घटना रविवारी (ता. १३) सकाळी ८:३० वाजता घडली. सुरक्षेच्या उपाययोजनांच्या अभावामुळे ही घटना घडल्याचा आरोप नागरिकांनी केला आहे.
याबाबत माहिती देताना स्थानिक माजी नगरसेवक अमेय घोले यांनी सांगितले, ‘इमारतीमध्ये लिफ्टसाठी जागा ठेवण्यात आली आहे. त्यात अद्याप लिफ्ट बसवलेली नाही. इमारतीत लिफ्ट बसवलेली नसताना संबंधित शाफ्ट मात्र पूर्णपणे उघडा होता. तिथे कोणतेही अडथळे, सूचना फलक किंवा सुरक्षारक्षक नव्हते. या बेजबाबदारपणामुळेच एका निरपराध नागरिकाचा जीव गेला आहे.’ एसआरएला लिफ्ट व सुरक्षेच्या बाबतीत लेखी तक्रारी करण्यात आल्या होत्या. दोन आठवड्यांपूर्वी अधिकाऱ्यांसोबत लिफ्ट पाहणी झाली होती; मात्र त्यानंतरही कोणतीही कार्यवाही झाली नाही,’ असे सांगण्यात आले. ‘‘हा अपघात नसून व्यवस्थेतील गंभीर बेजबाबदारपणा आहे. दोषींवर तत्काळ कठोर कारवाई झालीच पाहिजे,” अशी मागणी अमेय घोले यांनी केली आहे.