बुरशीजन्य संसर्गाचा धोका

बुरशीजन्य संसर्गाचा धोका
जे. जे. रुग्णालयात दीडपट रुग्णांची वाढ
सकाळ वृत्तसेवा
मुंबई, ता. १४ : पावसाळ्यात आर्द्रता आणि ओलसरपणा वाढल्याने बुरशीजन्य संसर्गाचे प्रमाण वाढले आहे. पालिकेच्या राजावाडी आणि जे. जे. रुग्णालयाच्या त्वचारोग विभागात पावसाळा सुरू झाल्यापासून अशा रुग्णांचे प्रमाण दीडपटीने वाढले आहे.
पावसाळ्यात गजकर्ण, खरूज आणि इसबगोल रुग्णांमध्ये दीडपटीने वाढ नोंदली गेली आहे. जे. जे. रुग्णालयाचे त्वचारोग विभागाचे प्रमुख डॉ. प्रल्हाद राठोड यांनी दिलेल्या माहितीनुसार ओपीडीमध्ये पावसाळ्यादरम्यान बुरशीजन्य संसर्ग झालेल्या रुग्णांचे प्रमाण वाढते. जर ओपीडीला ३०० रुग्ण येतात, तर ९० ते १०० रुग्ण या लक्षणांसह ओपीडीला येत आहेत. पूर्वी हे प्रमाण ६० ते ६५ एवढे होते.
......
आजाराची कारणे
बुरशीजन्य  संसर्गाला ‘एरिथेमॅटस रॅशेस’ म्हणून ओळखले जाते. ज्यात अंगठीच्या आकाराचे वर्तुळ तयार होऊन तेथे खाज येते. सामान्यत: त्वचा दुमडल्या जाणाऱ्या भागात, मांडीच्या सांध्यात, बगलेमध्ये ही वर्तुळे तयार होतात. शरीरातील ज्या भागात कायम घाम येतो किंवा शरीराचा जो भाग कायम ओलसर असतो. ही वर्तुळे हात-पायांच्या बोटांमध्ये तसेच पायाच्या तळव्यातदेखील होऊ शकतात. पाय जास्त वेळ ओलसर बुटांमध्ये राहिल्यानेदेखील ही समस्या उद्धभवते. या अवस्थेला ‘अँथलिट फूट’ असेही म्हणतात.
.....
लक्षणे
खाज
पुरळ
लाल चट्टे
.......
काळजी
ओलसर हवामानात संक्रमण अधिक प्रमाणात होते.
अंघोळीनंतर हात-पाय धुतल्यानंतर व्यवस्थित सुती कपड्याने कोरडे करणे.
ज्या व्यक्तीस संसर्ग आहे, त्याचे कपडे वेगळे धुणे,
त्वचारोग तज्ज्ञांकडे जाऊन औषधोपचार घ्यावेत.
.....
पावसाळ्यात सामान्यपणे फंगल (बुरशीजन्य) संसर्ग वाढतो. आर्द्रता आणि ओलसरपणा हे प्रमुख कारण असते. अनेकदा ताप आला की रॅशेस येतात. त्यावरून तापाचे निदान करता येते. हा संसर्ग पसरू नये, यासाठी त्वचारोग डॉक्टरांचा सल्ला घ्यावा.
- डॉ. स्वागता तांबे, राजावाडी रुग्णालय, त्वचारोगविकार विभाग