आर्थर रोड कारागृहात कैद्यांमध्ये हाणामारी

आर्थर रोड कारागृहात कैद्यांमध्ये हाणामारी
गँगस्टर प्रसाद पुजारीसह सात कैद्यांवर गुन्हा
सकाळ वृत्तसेवा
मुंबई, ता. १४ : क्षुल्लक कारणावरून आर्थर रोड कारागृहातील कैद्यांच्या दोन गटांत नुकतीच हाणामारीची घटना घडली. याप्रकरणी गँगस्टर प्रसाद पुजारीसह सात जणांविरोधात ना. म. जोशी मार्ग पोलिस ठाण्यात गुन्हा नोंद करण्यात आला आहे.
पाय पसरवून का बसला, अशा किरकोळ कारणावरून ६ जुलै रोजी आर्थर रोड मध्यवर्ती कारागृहात दोन कैद्यांमध्ये बाचाबाची झाली. त्यात गँगस्टर पुजारीसह दोन्ही बाजूंनी आणखी पाच कैदी सहभागी झाले. दोन गटांतील वाद हाणामारीवर गेल्याने कारागृह पोलिसांनी मध्यस्थी केली. या वादाची माहिती ना. म जोशी पोलिस ठाण्याला देण्यात आली असून, तेथे सात जणांविरोधात गुन्हा नोंद करण्यात आला आहे. पोलिसांनी आरोपींचा ताबा घेण्याऐवजी कारागृहात जाऊन या प्रकरणाचा तपास करण्याचा निर्णय घेतला.
दरम्यान, अंडरवर्ल्ड डॉन कुमार पिल्लेचे नाव वापरून विक्रोळी, कांजूरमार्ग, भांडुप या उपनगरांत खंडणीसह अनेक गुन्हे करणाऱ्या प्रसादचे गेल्यावर्षी चीनमधून प्रत्यार्पण करण्यात आले होते. तेव्हापासून तो आर्थर रोड कारागृहात बंद आहे.