टेम्पोच्या धडकेत दुचाकीस्वार ठार

टेम्पोच्या धडकेत दुचाकीस्वार ठार
पत्नी गंभीर जखमी; चालकाविरोधात गुन्हा
सकाळ वृत्तसेवा
मुंबई, ता. १४ ः भरधाव टेम्पोने दुचाकीला धडक दिल्याने दुचाकीस्वार तरुणाचा मृत्यू झाला, तर त्याची पत्नी गंभीर जखमी झाली. ही घटना रविवारी संध्याकाळी सातच्या सुमारास चेंबूरच्या अमर महल चौकानजीक पूर्व द्रुतगती मार्गावर घडली. अपघातानंतर टेम्पोचालक पसार झाला असून, त्याच्याविरोधात नेहरूनगर पोलिस ठाण्यात गुन्हा नोंद करण्यात आला.
पोलिसांनी दिलेल्या माहितीनुसार, शाहिद मन्सुरी (वय ३५) असे मृत तरुणाचे नाव आहे. तो आपल्या कुटुंबासह माटुंगा येथील लेबर कॅम्प परिसरात वास्तव्यास होता. शाहिद रविवारी संध्याकाळी माहेरी आलेल्या पत्नीला घेण्यासाठी दुचाकीवरून गोवंडीच्या लल्लूभाई कम्पाउंड येथे आला होता. पत्नीला घेऊन घराकडे जाताना पूर्व द्रुतगती मार्गावर त्याच्या दुचाकीला एका भरधाव टेम्पोने धडक दिली. या अपघातात शाहिद दुभाजकावर आपटला, तर पत्नी रस्त्यावर काही अंतर फरपटत पुढे गेली. अन्य वाहनचालकांनी दोघांना तातडीने शीव येथील लोकमान्य टिळक रुग्णालयात दाखल केले; मात्र उपचारादरम्यान रात्री दहाच्या सुमारास शाहिदचा मृत्यू झाला.