मुंबईत पावसाचे पुनरागमन

मुंबईत पावसाचे पुनरागमन
तापमानात घट, आर्द्रतेत वाढ
सकाळ वृत्तसेवा
मुंबई, ता. १४ : गेले काही दिवस मुंबईतून गायब झालेला पाऊस अखेर परतला. शहरात सोमवारी सकाळपासून पावसाच्या रिपरिप सरी कोसळत होत्या. दिवसभरात मध्यम ते हलका पाऊस सुरू राहिल्याने सर्वत्र अंधारमय वातावरण झाले होते.
सकाळपासून सुरू असलेल्या पावसाच्या सरींमुळे उकाड्याला काहीसा ब्रेक मिळाला असून, तापमानातही लक्षणीय घट झाली. कुलाबा प्रादेशिक हवामान केंद्राच्या माहितीनुसार, सोमवारी कुलाबामध्ये ५.८ मिमी तर सांताक्रुझमध्ये ७ मिमी पावसाची नोंद झाली. शहरात कमाल तापमान २९ अंश सेल्सिअस तर उपनगरांमध्ये २९.६ अंश सेल्सिअस इतके नोंदले गेले.सोमवारी आर्द्रता अनुक्रमे ९३ आणि ९२ टक्क्यांवर पोहोचली होती.दरम्यान, वाढत्या आर्द्रतेने मंगळवारी पाऊस असला तरी उकाडा जाणवण्याची शक्यता आहे.
---
पावसाचा अंदाज कायम
हवामान खात्याच्या अंदाजानुसार, शहर आणि उपनगरांत मंगळवारीदेखील हलक्या ते मध्यम स्वरूपाचा पाऊस कायम राहणार आहे. आकाश अंशतः ढगाळ राहील, तसेच अधूनमधून जोरदार वारेदेखील वाहतील.
...........