अकरावीच्या ९२ हजार जागा समर्पित

अकरावीच्या ९२ हजार जागा समर्पित
ऑनलाइन प्रवेश प्रक्रियेत अल्पसंख्याक महाविद्यालयांची दमछाक
संजीव भागवत : सकाळ वृत्तसेवा
मुंबई, ता. १५ : अकरावीतील सर्वच प्रवेश आपल्याला वाट्टेल त्या पद्धतीने भरता येतील, यासाठी भाषिक, धार्मिक आदींच्या नावाने अल्पसंख्याक दर्जा घेतलेल्या मुंबईसह राज्यातील अल्पसंख्याक महाविद्यालयांची दर्जानुसार जागा भरण्यासाठी दमछाक सुरू आहे. यामुळे आपला बचाव करण्यासाठी अकरावीच्या ऑनलाइन प्रवेश प्रक्रियेतील पहिल्या आणि दुसऱ्या फेरीच्या प्रवेश प्रक्रियेदरम्यान या महाविद्यालयांनी आपल्या कोट्यातील तब्बल ९२ हजार ५९८ जागा केंद्रीय प्रवेश फेरीसाठी (कॅप) समर्पित केल्याची माहिती शिक्षण संचालक डॉ. महेश पालकर यांनी दिली.

अल्पसंख्याक महाविद्यालयांनी किमान ५० टक्के जागा दर्जानुसार सलग तीन वर्षे भरणे बंधनकारक असते. त्या जागा भरल्यानंतर पुढील जागाही त्यांना भरण्याची मुभा मिळते, त्या जागा भरताना त्यांना कोणत्याही प्रकारच्या आरक्षणानुसार जागा भरण्याची अट लागू होत नाही, मात्र ५० टक्क्यांपेक्षा कमी जागा भरल्या जात असतील, तर त्या ठिकाणी अल्पसंख्याक दर्जावरून प्रश्नचिन्ह उपस्थित होतात, त्यातून आपला बचाव करण्यासाठी या महाविद्यालयांनी आपल्याकडील जागा कॅप फेरीसाठी समर्पित करण्याचा मार्ग स्वीकारतात. याच पार्श्वभूमीवर यंदा पहिल्या फेरीदरम्यान १० हजार ५१४ आणि दुसऱ्या फेरीदरम्यान ८२ हजार ८४ अशा एकूण ९२ हजार ५९८ जागा आतापर्यंत समर्पित केल्या आहेत.

मुंबईतील अल्पसंख्याक महाविद्यालये
धार्मिक
मुस्लिम ७०
ख्रिश्चन, रोम कॅथलिक ५५
शिख ९
बुद्धिस्ट ५
जैन ४
पारशी ३
एकूण १४६

मुंबईतील भाषिक अल्पसंख्याक महाविद्यालये
हिंदी १४४
गुजराती ७१
सिंधी ३४
कन्नड १६
मल्याळम १६
तमिळ १४
पंजाबी ९
उर्दू ६
तेलुगू २
कोकणी १
मारवाडी-१
एकूण ४८१

अशा आहेत त्रुटी
अल्पसंख्याक दर्जा देण्याचे अधिकार अल्पसंख्याक विभागाला आहेत. त्यांना इतर कोणतेही आरक्षण लागू होत नाही, मात्र दर्जा घेतल्यास ५० टक्के जागा त्यांना त्या-त्या अल्पसंख्याकांच्या भरणे बंधनकारक असते. तीन वर्षांत त्या जागा भरल्या नाहीत, तर विभागाला दर्जा काढून घेण्याचे अधिकार आहेत.