दिवसाला ४२ जणांना मलेरिया

सकाळ वृत्तसेवा
मुंबई, ता. १५ : शहरात डेंगी, चिकुनगुनिया, गॅस्ट्रोच्या रुग्णांमध्ये वाढ होत आहे. त्यामुळे पावसाळी आजारांचा धोका वाढला असून, दरदिवशी ४२ नागरिकांना मलेरियाची लागण होत आहे. महत्त्वाचे म्हणजे, झोपडपट्टीच्या तुलनेत मुंबईतील मोठ मोठ्या टॉवरमधून अशा रुग्णांची नोंद अधिक आहे.
महानगरात मलेरियाच्या डासांच्या चावण्यामुळे होणाऱ्या लोकांची संख्या लक्षणीयरित्या वाढत आहे. जुलैच्या पहिल्या १५ दिवसांत दररोज सरासरी ४२ जणांना मलेरियाची लागण होत आहे, तर दररोज १८ जणांना डेंगीची लागण होत आहे. चिकुनगुनियाचे ४३ रुग्णही आढळले आहेत. अनेकांना मलेरियाची लागण होत आहे. गेल्या वर्षी जानेवारी ते १५ जुलै या कालावधीत मुंबईत २८५७ जणांना मलेरियाची लागण झाली होती, तर बाधितांची संख्या ३४९० वर पोहोचली आहे. जुलैमध्ये ६३३ जणांना मलेरियाची लागण झाली आहे. मेपासून पाऊस सुरू झाल्याने कीटकजन्य आजारांसाठी पोषक वातावरण तयार झाल्यामुळे २०२४ च्या तुलनेत २०२५ मध्ये मलेरिया, चिकुनगुनिया, डेंगीच्या रुग्णसंख्येत वाढ होताना दिसत आहे.
-------------------------------------
डेंगीच्या रुग्णसंख्येत वाढ
सेंट जॉर्ज रुग्णालयात गेल्या १५ दिवसांत सुमारे सात ते आठ मलेरिया रुग्ण रुग्णालयात उपचारांसाठी आले आहेत. रुग्णांना सर्दीसोबत तापाची तक्रार येत आहे, पण या वेळी पोटदुखी आणि जुलाब, अशा तक्रारीदेखील असल्याचे अधीक्षक आणि औषध विभागाचे युनिटप्रमुख डॉ. विनायक सावर्डेकर यांनी सांगितले, तर घाटकोपर येथील राजावाडी रुग्णालयात सर्दीसोबतच ताप आणि अशक्तपणाची लक्षणे आढळतात. आरोग्य विभागाकडून मिळालेल्या माहितीनुसार, गेल्या १५ दिवसांत २८२ डेंगीबाधित असल्याचे अधीक्षक डॉ. भारती राजुलवाला यांनी सांगितले.
.....
पावसाळा आजारांची आकडेवारी (१४ जुलै २०२५ पर्यंत)
मलेरिया ३,४९०
डेंगी ७३४
चिकुनगुनिया १७९
लेप्टो १३६
गॅस्ट्रो ४,८३१