ऊसतोड कामगार कायद्याची प्रक्रिया गतीने पूर्ण करा : डॉ. नीलम गोऱ्हे

ऊसतोड कामगार कायद्याची प्रक्रिया गतीने पूर्ण करा : डॉ. नीलम गोऱ्हे

सकाळ वृत्तसेवा

मुंबई, ता. १५ : ‘ऊसतोड कामगारांसाठी स्वतंत्र कायदा तयार करून तो लवकरात लवकर लागू करण्यासाठी सहकार विभागाने कार्यवाही करावी, जेणेकरून विधेयक डिसेंबर अधिवेशनापूर्वीच अंतिम करून जनतेच्या सूचनांसाठी प्रसिद्ध करता येईल,’ असे मत मंगळवारी (ता. १५) उपसभापती डॉ. नीलम गोऱ्हे यांनी व्यक्त केले.

विधान भवनात ऊसतोड कामगारांच्या व महिला कामगारांच्या आरोग्य, सुरक्षाव्यवस्था आणि सामाजिक संरक्षणाच्या समस्या मार्गी लागाव्यात, यासाठी बैठक आयोजित करण्यात आली होती. या वेळी सहकारमंत्री बाबासाहेब पाटील, आमदार सदाभाऊ खोत, डॉ. मनीषा कायंदे, सहकार विभागाचे प्रधान सचिव प्रवीण दराडे, साखर आयुक्त सिद्धराम सालीमठ व संबंधित अधिकारी उपस्थित होते. या वेळी डॉ. नीलम गोऱ्हे म्हणाल्या की, ‘ऊसतोड कायदा तयार करताना कामगारांचा विचार अधिक करण्यात यावा, ऊसतोड कामगारांसाठी प्रत्येक कारखान्यावर आरोग्य तपासणीसाठी डॉक्टरांची ओपीडी सुरू ठेवावी आणि महिला कामगारांसाठी स्त्रीरोगतज्ज्ञाची नेमणूक करण्यात यावी तसेच प्रधानमंत्री जन आरोग्य योजनेत सर्व ऊसतोड कामगारांची नोंदणी करण्यात यावी’, अशा सूचना दिल्या. तसेच ऊसतोड महामंडळाच्या पोर्टलवर स्त्री पुरुष कामगारांची स्वतंत्र माहिती द्यावी, ऊसतोड कामगार महामंडळाने मॅटर्निटी बेनिफिट फंडाच्या माध्यमातून ऊसतोड महिला कामगारांना प्रसूती रजा कालावधीत किमान वेतन देण्याबाबत कार्यवाही करावी, कामाच्या ठिकाणी स्वच्छतागृह, सॅनिटरी पॅड उपलब्ध करून द्यावे, असेही उपसभापती डॉ. नीलम गोऱ्हे यांनी सांगितले.