बीएसई, एनएसईला बॉम्बस्फोटाची धमकी

बीएसई, एनएसईला
बॉम्बस्फोटाची धमकी
मुंबई, ता. १६ : बॉम्बे स्टॉक एक्स्चेंज (बीएसई) आणि नॅशनल स्टॉक एक्स्चेंज (एनएसई) या आस्थापनांना रविवारी बॉम्बस्फोटाची धमकी देणारा ई-मेल प्राप्त झाल्याने खळबळ उडाली आहे. केरळचे मुख्यमंत्री पिनारी विजयन यांच्या नावाचा वापर करून हा धमकीचा मेल पाठवण्यात आला होता. मेलमध्ये चार आरडीएक्सयुक्त आयईडी स्फोटके इमारतीत लावण्यात आली असून, दुपारी तीन वाजता स्फोट घडवून आणण्यात येईल, असे नमूद करण्यात आले होते. धमकीनंतर बीएसई आणि एनएसई कार्यालयांतील कर्मचाऱ्यांनी तत्काळ पोलिसांना माहिती दिली. पोलिसांनी दोन्ही ठिकाणी झाडाझडती घेतली असता कोणतीही संशयास्पद वस्तू आढळली नाही. यामुळे ही धमकी खोडसाळपणाची असून जनमानसात भीती निर्माण करण्याचा प्रयत्न होता, असे स्पष्ट झाले. याप्रकरणी माता रमाबाई आंबेडकर मार्ग आणि वांद्रे-कुर्ला संकुल पोलिस ठाण्यांत स्वतंत्र गुन्हे दाखल करण्यात आले आहेत.