मुंबईत अवैध बाईक टॅक्सी सुरूच!

मुंबईत अवैध बाइक टॅक्सी सुरूच!
१२३ वाहनांवर कारवाई; ॲप ऑपरेटरविरोधातही कायदेशीर प्रक्रिया सुरू
सकाळ वृत्तसेवा
मुंबई, ता. १६ : मुंबई महानगरात बेकायदा बाइक टॅक्सीमार्फत अवैध प्रवासी वाहतूक सुरूच आहे. याप्रकरणी परिवहन विभागाने केलेल्या कारवाईत १२३ वाहनांवर कारवाई करण्यात आली. त्यातील ७८ बाइक टॅक्सी जप्त केल्या असून, संबंधित चालकांवर गुन्हेही दाखल करण्यात आले आहेत. तसेच अवैध ॲप ऑपरेटरविरोधातही पुढील कायदेशीर प्रक्रिया सुरू करण्यात आल्याचे परिवहन विभागाच्या अधिकाऱ्यांनी सांगितले.
मुंबई महानगरात अवैध मार्गाने बाइक टॅक्सी सुरू असून, त्या माध्यमातून अनेकजण प्रवास करीत असल्याचे निदर्शनास आले. त्यासंदर्भात परिवहन विभागाकडे तक्रारी प्राप्त झाल्यानंतर तातडीने तपास सुरू करण्यात आला. तपासणीत काही बेकायदा ॲप्स आणि बाइक टॅक्सी चालकांकडून कोणत्याही परवानगीशिवाय प्रवासी वाहतूक केली जात असल्याचे समोर आले. त्यामुळे सरकारच्या महसुलाचे नुकसान तर होतेच, शिवाय प्रवाशांच्या सुरक्षिततेलाही धोका निर्माण होतो.
मोटार वाहन अधिनियम १९८८ च्या कलम ९३ नुसार, कोणत्याही प्रवासी वाहतूक सेवेच्या संचालनासाठी आवश्यक परवानगी घेणे बंधनकारक आहे, मात्र काही ॲप कंपन्या व चालक हे नियम धाब्यावर बसवत बेकायदेशीर वाहतूक करत असल्याचे उघड झाले आहे. या पार्श्वभूमीवर परिवहन विभागाच्या विशेष पथकांनी एकाच वेळी मुंबई, ठाणे, वसई, वाशी, पनवेल येथे संयुक्त कारवाई मोहीम राबवली. त्यात १२३ वाहनांवर कारवाई करण्यात आली. त्यातील ७८ बाइक टॅक्सी जप्त केल्या असून, संबंधित चालकांवर गुन्हेही दाखल करण्यात आले आहेत.