परिचारिकांचे आज कामबंद आंदोलन
परिचारिकांचे आज कामबंद आंदोलन
मागण्या मान्य न झाल्याने उद्यापासून बेमुदत संपाची हाक
सकाळ वृत्तसेवा
मुंबई, ता. १६ : राज्य सरकारी रुग्णालयांमध्ये कार्यरत पाचशेहून अधिक परिचारिकांनी बुधवारी (ता. १६) आझाद मैदानात आंदोलन केले. या आंदोलक परिचारिका उद्या १७ जुलै रोजी एक दिवस कामबंद आंदोलन करणार आहेत, मात्र सरकारकडून कोणतेही सकारात्मक उत्तर न मिळाल्यास १८ जुलैपासून या परिचारिकांनी बेमुदत कामबंद आंदोलनांची हाक दिली आहेत. यात राज्यातील सुमारे ३० हजार परिचारिकांचा समावेश असून, सर्व शासकीय रुग्णालयांमधील आरोग्यसेवा ठप्प होण्याची शक्यता निर्माण झाली आहे. या संपामागील मुख्य कारण म्हणजे सातव्या वेतन आयोगात स्टाफ नर्सेसची झालेली उपेक्षा आणि कंत्राटी पद्धतीने नियुक्त्या केल्यामुळे निर्माण झालेले नाराजीचे वातावरण आहे.
‘राज्य सरकारने नुकतीच १० नवीन वैद्यकीय महाविद्यालये सुरू केली आहेत, मात्र या नव्या रुग्णालयांमध्ये परिचारिकांची एकही नियुक्ती करण्यात आलेली नाही. त्याचबरोबर सध्या कार्यरत रुग्णालयांमध्ये सुमारे ५० टक्के परिचारिका पदे रिक्त आहेत. ‘प्रत्येक वैद्यकीय महाविद्यालय व रुग्णालयासाठी किमान ५०० परिचारिकांची गरज असते, मात्र सध्या इतकीच संख्या संपूर्ण राज्याच्या रुग्णालयात कार्यरत आहे. परिणामी, परिचारिकांवर प्रचंड कामाचा ताण आहे,’ असे महाराष्ट्र राज्य परिचारिका संघटनेच्या सरचिटणीस सुमित्रा तोटे यांनी सांगितले. सरकारकडून रिक्त पदांवर कंत्राटी पद्धतीने नियुक्त्या केल्या जात असल्याचा संघटनेने निषेध केला आहे. तसेच सातव्या वेतन आयोगाची अंमलबजावणी करताना फक्त बालरोग, मानसोपचार यांसारख्या विशेष विभागातील परिचारिकांनाच वेतनवाढ दिली जात आहे, उर्वरित स्टाफ नर्स, वॉर्ड इन्चार्ज, नर्सिंग शिक्षक यांना वगळण्यात आल्याचेही त्यांनी नमूद केले. वैद्यकीय शिक्षण मंत्री हसन मुश्रीफ यांच्याशी आम्ही चर्चा केली, मात्र कोणताही तोडगा निघालेला नसल्याचेही या वेळी सांगण्यात आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.