होमिओपॅथिक डॉक्टरांचा सरकारविरोधात आंदोलन

होमिओपॅथिक डॉक्टरांचे सरकारविरोधात आंदोलन

सकाळ वृत्तसेवा
मुंबई, ता. १६ : होमिओपॅथिक क्षेत्रातील हजारो डॉक्टरांनी बुधवारी (ता. १६) सरकारविरोधात आझाद मैदानावर निदर्शने केली. होमिओपॅथी कौन्सिलचे प्रशासक डॉ. बाहुबली शाह यांनी आमरण उपोषण पुकारले आहे. सर्टिफिकेट कोर्स इन मॉडर्न फार्माकोलॉजी (सीसीएमपी) हा कोर्स पूर्ण करूनही, होमिओपॅथिक डॉक्टरांची महाराष्ट्र मेडिकल कौन्सिल (एमएमसी)मध्ये नोंदणी होत नसल्याने त्यांनी आझाद मैदानावर हे आंदोलन करण्यात आले. सीसीएमपी अभ्यासक्रम पूर्ण केल्यानंतर, सरकारने होमिओपॅथिक बेसिक मॉडर्न मेडिसिनचा अभ्यास करण्यास आणि एमएमसीमध्ये नोंदणी करण्यास मान्यता दिली होती. सरकारची मान्यता आणि वैद्यकीय शिक्षण विभागाच्या अधिसूचनेला न जुमानता, इंडियन मेडिकल असोसिएशन (आयएमए)ने त्याला विरोध केला. आयएमए प्रतिनिधींनी मुख्यमंत्र्यांसोबत बैठक घेतली, त्यानंतर सरकारने होमिओपॅथिक डॉक्टरांची नोंदणी प्रक्रिया थांबवली. याच्या निषेधार्थ, महाराष्ट्र होमिओपॅथी कौन्सिलने आझाद मैदानावर ही निदर्शने केली, ज्यामध्ये हजारो डॉक्टर सहभागी झाले होते. या वेळी आंदोलनाचे नेतृत्व करणारे डॉ. बाहुबली शाह म्हणाले की, ‘वैद्यकीय शिक्षण मंत्री हसन मुश्रीफ यांच्याशी आमची बैठक झाली आहे. त्यांनी समस्येवर तोडगा काढण्याचे आश्वासन दिले आहे. आम्ही मुख्यमंत्र्यांनाही भेटणार आहोत, पण निर्णय होईपर्यंत मी आमरण उपोषण करणार आहे.’