परिचारिका संपाचा रुग्णसेवेवर अल्प परिणाम

परिचारिका संपाचा
रुग्णसेवेवर अल्प परिणाम
मुंबई, ता. १७ : सरकारी रुग्णालयातील परिचारिकांची रिक्त पदे तातडीने भरणे, कंत्राटी पद्धतीने भरती करण्यात येऊ नये, अशा विविध मागण्यांसाठी गुरुवारी (ता. १७) राज्यातील ३० हजार परिचारिकांनी काम बंद आंदोलन पुकारले; मात्र या आंदोलनाची दखल घेत रुग्णालय प्रशासनाने घेतलेल्या खबरदारीमुळे रुग्णसेवेवर फारसा परिणाम झाला नाही. काही रुग्णालयांमध्ये मोजक्याच शस्त्रक्रिया पुढे ढकलण्यात आल्या.
सरकारी रुग्णालयातील परिचारिकांनी विविध मागण्यांसाठी काही दिवसांपासून आझाद मैदानामध्ये धरणे आंदोलन करीत आहेत; मात्र त्यांच्या समस्येकडे दुर्लक्ष करण्यात येत असल्याने गुरुवारी परिचारिकांनी काम बंद आंदोलन करण्याचा निर्णय घेतला. त्यानुसार मुंबईतील जे.जे. रुग्णालय, सेंट जॉर्जेस रुग्णालय, जी.टी. रुग्णालय व कामा या सरकारी रुग्णालयातील परिचारिकांनी काम बंद ठेवले. परिचारिकांच्या काम बंद आंदोलनाची दखल घेत रुग्णालय प्रशासनाने योग्य खबरदारी घेत रुग्णसेवा बाधित होणार नाही, याची काळजी घेतली. रुग्णालयातील शिकाऊ परिचारिका व वरिष्ठ श्रेणी असलेल्या परिचारिकांची रुग्णकक्ष व शस्त्रक्रियागृहामध्ये नियुक्ती केली. त्यामुळे रुग्णसेवेवर फारसा परिणाम झाला नाही. तसेच काही नियोजित शस्त्रक्रिया पुढे ढकलण्यात आल्याची माहिती जे.जे. रुग्णालयाचे अधिष्ठाता डॉ. अजय भंडारवार यांनी दिली.