‘जेजे’च्या विद्यार्थिनीचा आत्महत्येचा प्रयत्न

‘जेजे’च्या विद्यार्थिनीचा आत्महत्येचा प्रयत्न
चौकशीसाठी समिती स्थापन

सकाळ वृत्तसेवा
मुंबई, ता. १८ : जे.जे. रुग्णालयातील अंतिम वर्षाच्या निवासी डॉक्टरने बुधवारी (ता. १६) आत्महत्येचा प्रयत्न केला. २८ वर्षीय डॉक्टरने चिंता आणि झोपेच्या समस्यांवर दिल्या जाणाऱ्या गोळ्या घेतल्याचे सांगितले जात आहे. तिच्या सहकाऱ्यांनी तिला रुग्णालयाच्या आपत्कालीन विभागात दाखल केले. तत्काळ उपचारांमुळे ती आता बरी आहे. याबाबत चौकशी केली जाणार आहे.
रुग्णालयाशी संबंधित सूत्रांनी दिलेल्या माहितीनुसार, डॉक्टर आधीच मानसिक आरोग्याशी संबंधित समस्यांसाठी औषधे घेत होती. तिने एकाच वेळी अनेक गोळ्या घेतल्या होत्या. एक शिक्षक तिला मानसिक त्रास देत असल्याचा आरोपही विद्यार्थिनीने केला आहे. या घटनेनंतर, जे.जे. रुग्णालय प्रशासन आणि वैद्यकीय शिक्षण आणि संशोधन संचालनालय (डीएमईआर)ने दोन स्वतंत्र चौकशी समित्या स्थापन केल्या आहेत. रुग्णालयाच्या अंतर्गत पातळीवर एक चौकशी समिती काम करीत असताना, डीएमईआर समिती निवासी डॉक्टर, प्राध्यापक आणि प्रशासकीय कर्मचाऱ्यांचे जबाब घेत आहे.
काही वर्गमित्रांनी असा दावा केला आहे, की डॉक्टरला कामाच्या ठिकाणी मानसिक छळाचा सामना करावा लागत होता; परंतु रुग्णालय प्रशासनाने या दाव्याला दुजोरा दिलेला नाही आणि असे म्हटले आहे, की चौकशी समिती शैक्षणिक दबाव, कौटुंबिक ताण आणि मानसिक आरोग्य स्थितीसह सर्व पैलूंची निष्पक्षपणे चौकशी करेल.
...
डीएमईआरही चौकशी करणार!
जे.जे. रुग्णालयाचे डीन डॉ. अजय चंदनवाले म्हणाले, ‘आम्ही या प्रकरणात चौकशी समिती स्थापन केली आहे. याशिवाय डीएमईआरनेही चौकशी समिती स्थापन केली आहे. ही घटना अशा वेळी उघडकीस आली आहे, जेव्हा सोमवारी (ता. ७) जे.जे. रुग्णालयाचे वरिष्ठ निवासी डॉक्टर डॉ. ओंकार भगवान कविताके यांनी आत्महत्या केल्याचा आरोप आहे.’