रोहित पवार यांची पोलिसांशी बाचाबाची

रोहित पवार यांची
पोलिसांशी बाचाबाची

आझाद मैदान पोलिस ठाण्यात मध्यरात्री राडा

मुंबई, ता. १८ : विधिमंडळाच्या आवारातील हाणामारी, आमदार जितेंद्र आव्हाड यांचे आंदोलन, मरीन ड्राइव्ह पोलिस ठाण्याबाहेर जमलेल्या राष्ट्रवादी कार्यकर्त्यांची घोषणाबाजी, यामुळे गुरुवारी (ता. १७) मध्यरात्री तणावपूर्ण वातावरण होते. या पार्श्वभूमीवर कोणताही संबंध नसताना आझाद मैदान पोलिस ठाण्यात हाय व्होल्टेज ड्रामा घडला.

हाणामारीत सहभागी कार्यकर्ते नितीन देशमुख यांना विधिमंडळातून ताब्यात घेत मध्यरात्री मरीन ड्राइव्ह पोलिस ठाण्यात आणण्यात आले. त्यांच्या मागोमाग आमदार आव्हाड, रोहित पवार आणि कार्यकर्त्यांचा ताफा पोलिस ठाण्याच्या आवारात जमा झाला. या तणावपूर्ण वातावरणात गुन्हा नोंदवण्याची, अटकेची प्रक्रिया पूर्ण करणे पोलिसांना कठीण झाले होते. पोलिस ठाण्याबाहेर जमलेल्या कार्यकर्त्यांमुळे आरोपींची सुरक्षा आणि दोन गटांत हाणामारीची शक्यता होती. त्याच वेळी देशमुख यांना आझाद मैदान पोलिस ठाण्यात ठेवण्यात आल्याची वावडी उठली. त्यानुसार रोहित पवार कार्यकर्त्यांसह आझाद मैदान पोलिस ठाण्यात पोहोचले. नितीन देशमुख कुठे आहेत, असा सवाल करीतच पवार पोलिस ठाण्यात आले. त्यांच्या या प्रश्नाने उपस्थित पोलिस अधिकारी, अंमलदार भांबावले. देशमुख येथे नाहीत. हे प्रकरण मरीन ड्राइव्ह पोलिस ठाण्याचे आहे, असे उपस्थित अधिकाऱ्याने सांगितले; मात्र पोलिस खोटी माहिती देत आहेत, असा समज करून पवार संतापले. त्यामुळे त्यांना समजावण्याचा प्रयत्न करणाऱ्या अधिकाऱ्याचाही आवाज वाढला. तेव्हा आवाज खाली, शहाणपणा करायचा नाही. हात वर केला तर सांगतो तुम्हाला, असे सांगत पवार यांनी पोलिस अधिकाऱ्यांना दम दिला. या वेळी कार्यकर्त्यांनी घोषणा देत पोलिस ठाणे डोक्यावर घेतले.
-----
...अखेर समजूत काढली!
या प्रकाराची माहिती मिळताच अधिकची कुमक घेऊन तेथे दाखल झालेले कफ परेड पोलिस ठाण्याचे वरिष्ठ पोलिस निरीक्षक सतीश गायकवाड यांनी मध्यस्थी करीत परिस्थिती अचूकरीत्या हाताळली. त्यांनी पवार आणि कार्यकर्त्यांची समजूत घातली, तेव्हा वातावरण निवळले आणि कार्यकर्त्यांसह पवार तेथून निघून गेले. याचदरम्यान मरीन ड्राइव्ह पोलिसांनी देशमुख, टकले यांच्याविरोधात गुन्हा नोंदवण्याची प्रक्रिया पूर्ण केली.