मुंबई सेंट्रल-इंदूरदरम्यान तेजस स्पेशल

मुंबई सेंट्रल-इंदूरदरम्यान तेजस स्पेशल
सकाळ वृत्तसेवा
मुंबई, ता. १९ : प्रवाशांची वाढती मागणी लक्षात घेऊन पश्चिम रेल्वेने मुंबई सेंट्रल आणि इंदूरदरम्यान खास सुपरफास्ट तेजस स्पेशल ट्रेन चालवण्याचा निर्णय घेतला आहे. ही सेवा बुधवारी (ता. २३)पासून सुरू होणार असून २९ ऑगस्ट २०२५ पर्यंत ३४ फेऱ्यांमध्ये ही ट्रेन धावणार आहे.
पश्चिम रेल्वेने दिलेल्या माहितीनुसार, (०९०८५) मुंबई सेंट्रल-इंदूर तेजस स्पेशल प्रत्येक सोमवार, बुधवार आणि शुक्रवार रात्री ११.२० वाजता मुंबई सेंट्रलहून सुटेल आणि दुसऱ्या दिवशी दुपारी एक वाजता इंदूरला पोहोचेल. परतीची (०९०८६) इंदूर-मुंबई सेंट्रल तेजस स्पेशल प्रत्येक मंगळवार, गुरुवार आणि शनिवार इंदूरहून सायंकाळी पाच वाजता सुटेल व दुसऱ्या दिवशी सकाळी ७.१० वाजता मुंबई सेंट्रलला पोहोचेल.
ही विशेष गाडी दोन्ही दिशांनी बोरिवली, वापी, सुरत, बडोदा, दाहोद, रतलाम आणि उज्जैन या स्थानकांवर थांबेल. प्रवाशांच्या सोयीसाठी फर्स्ट एसी, एसी टू टियर आणि एसी थ्री टियर कोचचा समावेश करण्यात आला आहे. या विशेष गाडीचे आरक्षण २१ जुलैपासून सर्व भारतीय रेल्वेच्या आरक्षण केंद्रावर आणि आयआरसीटीच्या अधिकृत संकेतस्थळावर सुरू होणार आहे.