किडनी विकण्याच्या बहाण्याने फसवणूक

किडनी विकण्याच्या बहाण्याने फसवणूक
एक कोटी देण्याऐवजी तीन लाखांचा गंडा
सकाळ वृत्तसेवा
मुंबई, ता. १९ ः किडनी विकून कर्जाचा डोंगर कमी करता येईल, या विचारात असलेल्या मुंबईतील तरुणाला सायबर भामट्यांनी तीन लाखांचा गंडा घातला. या प्रकरणी दहिसर पोलिसांनी नुकताच फसवणुकीचा गुन्हा दाखल केला.
किडनी विकून एक कोटी रुपये मिळतील, असे प्रलोभन तक्रारदार तरुणाला दाखवण्यात आले होते; मात्र त्यासाठी आधी तीन लाख रुपये भरावे लागतील, असे सांगण्यात आले. एक कोटी मिळतील या आशेवर गेल्यावर्षी जून-जुलै महिन्यात तरुणाने कर्ज घेऊन ही रक्कम अदा केली. त्यानंतर किडनी देण्यासाठी चौकशी केली असता, भामट्यांनी त्याला वर्षभर उडवाउडवीची उत्तरे देत ताटकळत ठेवले. फसवणूक झाल्याचे लक्षात येताच या तरुणाने अलीकडे नॅशनल पोर्टलवर तक्रार दाखल केली. त्याआधारे दहिसर पोलिसांनी १७ जुलै रोजी फसवणुकीचा गुन्हा नोंदवला.
दहिसर येथील प्रशांत नागवेकर एका खासगी कंपनीत शिपाई आहे. घरची आर्थिक परिस्थिती बेताची असल्याने प्रशांतने गरजेपोटी वेळोवेळी कर्ज घेतले. अंगावरील कर्ज कसे फेडावे, या विचारात असलेल्या प्रशांतला किडनी विकून भरपूर पैसे मिळतील, अशी कल्पना सूचली. त्याबाबत किडनी कुठे विकता येईल, याचा गुगलवर शोध सुरू केला. दिल्ली येथील सह्याद्री रुग्णालयात किडनी विकत घेतली जाते, अशी माहिती मिळाल्यानंतर तेथील संपर्क क्रमांक मिळवून प्रशांतने चर्चाही केली. समोरून बोलणाऱ्या व्यक्तीने प्रशांतची इत्यंभूत माहिती घेतली. आपण किडनी दिल्यास आपल्याला एक कोटी रुपये रोख दिले जातील; मात्र या प्रक्रियेसाठी तीन लाख रुपये द्यावे लागतील, असे त्याला सांगण्यात आले. जुळवाजुळव करून प्रशांतने महिन्याभरातही रक्कम रुग्णालयातून देण्यात आलेल्या खात्यावर पाठवली.
रक्कम देताच किडनी देण्यासाठी कधी बोलवले जाईल, अशी विचारणा केली असता, काही महिने ताटकळत ठेवण्यात आले. अखेर फसवणूक झाल्याचे लक्षात आल्यावर त्याने तक्रार दाखल केली.