सैफ अली खानवरील हल्ल्याची कथा काल्पनिक

सैफ अली खानवरील
हल्ल्याची कथा काल्पनिक
आरोपीचा जामिनावेळी युक्तिवाद
सकाळ वृत्तसेवा
मुंबई, ता. १९ ः अभिनेता सैफ अली खानच्या वांद्रे येथील घरात घुसून त्याच्यावर चाकूचे वार केल्याच्या आरोपात अटकेत असलेला बांगलादेशी नागरिक मोहम्मद शरीफुल इस्लाम शहजादने सत्र न्यायालयात जामिनाची मागणी केली आहे. आपण निर्दोष असून आपल्याविरुद्धचा गुन्हा हा काल्पनिक कथेच्या आधारे दाखल करण्यात आल्याचा दावा त्याने केला आहे. न्यायालयाने त्याच्या या अर्जाची दखल घेऊन सरकारी पक्षाला २१ जुलैपर्यंत उत्तर दाखल करण्याचे आदेश दिले.
शरीफुल सध्या आर्थर मध्यवर्ती कारागृहात बंदिस्त आहे. त्याने यापूर्वी एप्रिल महिन्यात सत्र न्यायालयात जामिनासाठी अर्ज केला होता. तथापि, त्याने हा अर्ज मागे घेतला आणि वांद्रे दंडाधिकाऱ्यांकडे नव्याने अर्ज केला. दंडाधिकारी न्यायालयाने त्याला जामीन देण्यास नकार दिल्यानंतर शरीफुल याने आता पुन्हा एकदा सत्र न्यायालयात धाव घेऊन जामिनासाठी अर्ज केला आहे. या प्रकरणी करण्यात आलेली तक्रार ही कल्पनिक असल्याचा मुख्य दावा शरीफुल याने जामीन अर्जात केला आहे. याशिवाय, आपल्याला अटक करताना योग्य कायदेशीर प्रक्रियेचे पालन केले गेले नाही. त्यामुळे, आपली अटक बेकायदा असल्याचा दावादेखील त्याने केला आहे. पोलिसांनी आपल्याविरुद्ध आरोपपत्र दाखल केले आहे. शिवाय, प्रकरणाचा तपासही पूर्ण झाला असून घटनेशी संबंधित सर्व पुरावे पोलिसांनी हस्तगत केले आहे. आपल्याकडून साक्षीदारांना कुठलाही धोका नाही. त्यामुळे, आपल्याला जामीन देण्यात यावा, असा दावा शरीफुलने केला आहे.