मोनोरेलच्या ताफ्यात सहा नव्या गाड्यांची भर

मोनोरेलच्या ताफ्यात सहा नव्या गाड्यांची भर
मोनोरेलकडून चाचण्या सुरू; फ्रिक्वेन्सी वाढणार, प्रवाशांना दिलासा मिळणार
बापू सुळे
सकाळ वृत्तसेवा
मुंबई, ता. २१ : कमी फेऱ्या आणि वारंवार होणाऱ्या तांत्रिक बिघाडामुळे मुंबईकरांच्या पसंतीला उतरू न शकलेल्या मोनोरेलला आता सुगीचे दिवस येणार आहेत. मोनोरेलच्या ताफ्यात लवकरच सहा नव्या गाड्या दाखल केल्या जाणार आहेत. सध्या या गाड्यांच्या चाचण्या सुरू असून, त्या लवकरच प्रवासी सेवेत येणार आहेत. त्यामुळे फ्रिक्वेन्सी वाढणार असल्याने दोन गाड्यांमधील वेळ कमी होणार आहे. तसेच प्रवासी वाहून नेण्याची क्षमताही वाढणार असल्याने मुंबईकरांना मोठा दिलासा मिळू शकणार आहे.
सध्या चेंबूर-संत गाडगे महाराज चौक सात रस्ता या मोनोरेल मार्गावर एमएमआरडीएकडून सहा गाड्यांच्या माध्यमातून दररोज १४२ फेऱ्या चालवल्या जात आहेत. मोनोरेल गाड्या कमी उपलब्ध असल्याने सुमारे १५ मिनिटांनी एक गाडी धावते. त्यामुळे एक गाडी सुटली तर पुढे १५-१० मिनिटे गाडीची प्रतीक्षा करावी लागते. त्यामुळे मुंबईकरांकडून मोनोरेलचा प्रवास टाळला जातो. मात्र मोनोरेलच्या सेवेत सुधारणा करण्यासाठी एमएमआरडीए मेधा एसएमएच रेल प्रायव्हेट लिमिटेडकडून १० गाड्या खरेदी करण्याचा निर्णय घेतला होता. त्यापैकी आतापर्यंत प्रत्येकी चार डब्यांच्या सहा मोनोरेल आल्या असून, त्याची अंतिम टप्प्यातील चाचणी सुरू आहे. ती पूर्ण झाल्यानंतर तत्काळ या गाड्या प्रवासी सेवेत दाखल केल्या जाणार असल्याची माहिती एमएमआरडीएच्या एका वरिष्ठ अधिकाऱ्याने दिली.

दुप्पट फेऱ्या होणार
सध्या मोनोरेलच्या ताफ्यात प्रत्येकी चार डब्यांच्या केवळ सहा मोनोरेल असून, त्या माध्यमातून १५ मिनिटांच्या अंतराने १४२ फेऱ्या चालवल्या जातात. मात्र आता नव्या सहा मोनोरेल सेवेत आल्यास क्षमता दुप्पट होणार असून, दोन गाड्यांमधील वेळ कमी करणे शक्य होणार आहे. तसेच जुन्या गाड्यांचा विचार करता नव्याने आलेल्या मोनोरेलची प्रवासी वाहतूक क्षमता १० टक्क्यांनी जास्त आहे.

ग्राफिक्स
मोनोरेलच्या ताफ्यातील गाड्या - ६
प्रत्येकी प्रवासी क्षमता - ५६८
दोन गाड्यांमधील वेळ - १५ मिनिटे
नव्याने आलेल्या गाड्या - १०
प्रवासी क्षमता - सुमारे ६२०
दोन फेऱ्यांमधील वेळ - ८-१० मिनिटांपर्यंत कमी होऊ शकेल