चौकशी होईपर्यंत कारवाई करू नये!

चौकशी होईपर्यंत कारवाई करू नये!

मुंबई, ता. २१ : सर जे. जे. रुग्णालयातील बालरोग विभागप्रमुख डॉ. बेला वर्मा यांच्याविरोधात कनिष्ठ निवासी डॉक्टरने त्रास दिल्याचा आरोप करत आत्महत्येचा प्रयत्न केल्याचा प्रकार समोर आला आहे, मात्र संबंधित विभागप्रमुखांनी हे आरोप निराधार असल्याचे स्पष्ट करत आपली बाजू मांडली असून, याप्रकरणी संपूर्ण आणि निष्पक्ष चौकशी होईपर्यंत कोणतीही तातडीची कारवाई करण्यात येऊ नये, अशी मागणी महाराष्ट्र स्टेट मेडिकल टीचर्स असोसिएशनने अधिष्ठातांकडे लेखी पत्राद्वारे केली आहे. ही बाब अत्यंत संवेदनशील असून, तिचा तपास नैसर्गिक न्यायाच्या तत्त्वांना धरून करावा, असे संघटनेने म्हटले आहे. संस्थेतील वातावरण निष्पक्ष आणि समतोल राहावे, यासाठी प्रत्येक घटकाला आपली भूमिका मांडण्याची संधी मिळाली पाहिजे, असेही संघटनेचे मत आहे. शिस्तभंगात्मक कारवाई करण्यापूर्वी संबंधित शिक्षकाचे म्हणणे गांभीर्याने ऐकले जावे आणि भविष्यात कोणत्याही प्राध्यापकाविरोधात अशाप्रकारे पूर्वग्रहदूषित पावले उचलली जाऊ नयेत,’ अशी मागणी पत्रात करण्यात आली आहे.