मुंबईत दमदार पाऊस

मुंबईत दमदार पाऊस
सखल भागात पाणी; अंधेरी सबवे बंद
सकाळ वृत्तसेवा
मुंबई, ता. २१ : मुंबईसह परिसरात सोमवारी सकाळपासून पावसाने जोरदार हजेरी लावली. कधी मध्यम, तर कधी जोरदार सरी कोसळल्याने दिवसभरात सरासरी ३२.९२ मिमी पावसाची नोंद झाली. मुसळधार पावसामुळे मुंबईतील अनेक सखल भागात पाणी साचले होते. अंधेरी सबवे पूर्णपणे पाण्याखाली गेल्याने तो वाहतुकीसाठी बंद करण्यात आला होता.
मुंबईत सकाळपासून घाटकोपर, अंधेरी, कुर्ला, चेंबूर या भागांमध्ये जोरदार सरी कोसळल्याने येथील रस्त्यांवर पाणी साचले होते. अंधेरी सबवे पूर्णपणे पाण्याखाली गेला होता. त्यामुळे अनेक ठिकाणी वाहतूक कोंडी झाली होती. विलेपार्ले, मरीन ड्राइव्ह आणि सीएसएमटी परिसरातही काही ठिकाणी वाहतूक मंदावली. हवामान खात्याच्या अंदाजानुसार, मंगळवारी सकाळपर्यंत हलक्या सरींसह पाऊस सुरू राहण्याची शक्यता आहे, त्यामुळे नागरिकांनी काळजी घेण्याचे आवाहन करण्यात आले आहे.
---
आर्द्रतेमुळे उकाडा
कुलाबा वेधशाळेनुसार आजचे कमाल तापमान २८ अंश सेल्सिअस होते आणि आर्द्रता ९५ टक्के होती. सांताक्रुझ वेधशाळेने कमाल तापमान २७.८ अंश, किमान तापमान २५ अंश आणि आर्द्रता ९३ टक्के नोंद झाल्याचे सांगितले. आर्द्रता दमट हवामानामुळे दिवसभर उकाडा जाणवत होता.
..........
विभागनिहाय पाऊस
पूर्व उपनगर : २२.४० मिमी
पश्चिम उपनगर : ४०.७५ मिमी
मुंबई शहर : ३५.६२ मिमी