निकालपत्राचे विश्लेषण करून पुढील निर्णय!

निकालपत्राचे विश्लेषण
करून पुढील निर्णय!
न्यायालयाच्या निकालावर एटीएसची प्रतिक्रिया
सकाळ वृत्तसेवा
मुंबई, ता. २१ ः विशेष मकोका न्यायालयाने दिलेला निकाल रद्दबातल ठरवत उच्च न्यायालयाने २००६च्या बॉम्बस्फोटांतील १२ आरोपींची निर्दोष मुक्तता केली. उच्च न्यायालयाच्या निकापत्राचे विश्लेषण करून या खटल्यातील विशेष सरकारी वकिलांशी सल्लामसलत केली जाईल आणि पुढील निर्णय घेतला जाईल, अशी प्रतिक्रिया राज्य दहशतवाद विरोधी पथकाने (एटीएस) दिली.
उच्च न्यायालयाच्या निकालाला सर्वोच्च न्यायालयात आव्हान देण्याची संधी एटीएस अर्थात राज्य शासनाकडे आहे. एरव्ही प्रत्येक निकालानंतर वरच्या न्यायालयात आव्हान देईपर्यंत त्या निकालाला तात्पुरती स्थगिती देण्याची मागणी होते; मात्र सोमवारी तसे काहीच न घडल्याने आश्चर्य व्यक्त होत आहे.
बॉम्बस्फोट झाला तेव्हा आयपीएस अधिकारी के. पी. रघुवंशी एटीएस प्रमुख होते. उच्च न्यायालयाच्या आजच्या निकालाबाबत रघुवंशी यांच्यासह तपासातील सहभागी तत्कालीन अधिकाऱ्यांशी बोलण्याचा प्रयत्न केला असता, कोणीही प्रतिक्रिया वा माहिती देण्यास तयार नव्हते.