आमच्या यातना कोणाला दिसणार?

आमच्या यातना कोणाला दिसणार?
निर्दोष सुटलेल्यांच्या कुटुंबीयांची प्रतिक्रिया

७/११ बॉम्बस्फोट मालिका घडविल्याच्या आरोपातून उच्च न्यायालयाने निर्दोष सुटका केल्यानंतर १२ आरोपींच्या कुटुंबीयांनी सुटकेचा निःश्वास सोडला. या १९ वर्षांत आम्हीही यातना भोगल्या; पण त्या कोणालाही दिसल्या नाहीत. आम्हालाही संशयानेच पाहिले जात होते. या भयंकर आरोपामुळे प्रत्येकाच्या कुटुंबाने धसका घेतला, त्या धक्क्यात कोणाची आई गेली, कोणाचे वडील गेले, संसार उद्ध्वस्त झाले, मुलांवर परिणाम झाला; पण या लढ्याला सोमवारी (ता. २१) उच्च न्यायालयाच्या निकालाने यश मिळाले, अशा प्रतिक्रिया आरोपींच्या कुटुंबीयांनी नोंदवल्या.
युनानी डॉक्टर तन्वीर अन्सारीला अटक झाली; तेव्हा त्याची पत्नी गरोदर होती. दहशतवादी कृत्याचा, १८० निष्पाप प्रवाशांच्या हत्येमागील आरोप गर्भवती वहिनीने कसा सहन केला असेल. अटकेनंतर पोलिस कोठडीत तन्वीरवर अमानुष अत्याचार झाले. जेव्हा आम्ही त्याला पाहिले, तो रक्तबंबाळ होता. तो निर्दोष आहे, त्याने हा गुन्हा केलेला नाही, हे आम्ही तेव्हा ओरडून ओरडून सांगत होतो; पण तो आवाज कोणीच ऐकला नाही. त्या धक्क्याने त्यांचे निधन झाले, असे तन्वीरचे भाऊ मकसूद सांगत होते.

जमीर शेखचे भाऊ शरिफुल यांनी दिलेल्या प्रतिक्रियेनुसार, मकोका न्यायालयाच्या निकालानंतरही आमचा न्यायालयीन लढा सुरूच होता. सोमवारी त्या लढ्याला यश आले. जमीरला अटक झाली तेव्हा त्याचा मुलगा चार वर्षांचा होता. मुलाने इंजिनिअरिंगचे शिक्षण पूर्ण केले असून मुलगी शिक्षण घेत आहे, असेही शरिफुल यांनी सांगितले.