नागपूर नागभीड ब्रॉड गेज मार्गाचे दिवाळीपूर्वी लोकार्पण

नागपूर नागभीड ब्रॉड गेज मार्गाचे दिवाळीपूर्वी लोकार्पण
परिवहन मंत्री प्रताप सरनाईक यांच्याकडून आढावा बैठक

सकाळ वृत्तसेवा
मुंबई, ता. २२ : नागपूर ते नागभीड हा १०६ किलोमीटरचा नॅरो गेज लोहमार्ग ब्रॉड गेजमध्ये रूपांतरित करण्याचे काम पूर्ण होत असून, दिवाळीपूर्वी ईटावरी ते उमरेड या ५१ किमी मार्गाचे लोकार्पण होईल, अशी माहिती परिवहन मंत्री प्रताप सरनाईक यांनी दिली. ते मंत्रालयात बोलावलेल्या महारेल कॉर्पोरेशनच्या कामाच्या आढावा बैठकीमध्ये बोलत होते. या बैठकीला महारेल कॉर्पोरेशनचे उपाध्यक्ष राजेश कुमार जैस्वाल, परिवहन विभागाचे उपसचिव किरण होळकर आणि संबंधित अधिकारी उपस्थित होते.

मंत्री सरनाईक म्हणाले, ‘नागपूरजवळील ईटावरी स्थानकापासून नागभीडपर्यंत सुमारे १०६ किलोमीटरचा नॅरो गेज लोहमार्ग ब्रॉड गेजमध्ये रूपांतरित करण्याचे काम लवकरच पूर्ण करण्याचे निर्देश महारेल कॉर्पोरेशनला दिले आहेत. त्यापैकी ईटावरी ते उमरेड या ५१ किलोमीटरच्या लोहमार्गाचे लोकार्पण दिवाळीपूर्वी करण्याच्या सूचना संबंधितांना देण्यात आलेल्या आहेत. या लोहमार्गाच्या नूतनीकरणामुळे १२ ते १४ छोटी-मोठी गावे नागपूरसारख्या महानगराशी जोडली जातील. तसेच मुख्यमंत्री देवेंद्र फडणवीस यांच्या संकल्पनेतून साकारत असलेला ‘रेल्वे फाटक मुक्त महाराष्ट्र’ हा प्रकल्प म्हणजे महाराष्ट्रातील सर्व रेल्वे फाटकांचे रूपांतर रेल्वे उड्डाणपुलामध्ये करण्याची मोठी जबाबदारी महारेल कॉर्पोरेशनला देण्यात आली आहे. हे रेल्वे उड्डाणपूलदेखील गतीने पूर्ण करण्याच्या सूचना मंत्री सरनाईक यांनी या वेळी दिल्या.