परिचारिकांच्या संपामुळे वॉर्ड रिकामे,

परिचारिकांच्या संपामुळे वॉर्ड रिकामे
जेजेमध्ये रुग्णांच्या शस्त्रक्रिया पुढे ढकलल्या
सकाळ वृत्तसेवा
मुंबई, ता. २२ : राज्यातील सुमारे ३०,००० परिचारिका गेल्या गुरुवारपासून (ता. १७) समान वेतन, रिक्त पदांवर नियुक्ती आणि भत्ते यासाठी संपावर आहेत. परिचारिकांच्या संपाचा परिणाम जे. जे. रुग्णालय तसेच राज्यातील इतर ठिकाणी माेठ्या प्रमाणावर आढळून येत आहे.
जे. जे. रुग्णालयात आठवड्यापूर्वी वॉर्डमध्ये बेड रिकामे नसल्याचे चित्र पाहायला मिळत हाेते. जागेअभावी काही रुग्णांना जमिनीवर झोपून उपचार घ्यावे लागत, मात्र आता अनेक वॉर्ड रिकामे आहेत.
मेडिसिन वॉर्डमध्ये फक्त चार ते पाच रुग्ण असून, त्यांच्यावर निवासी परिचारिकेकडून उपचार केले जात आहेत. काही सूत्रांनी अशी माहिती दिली, की रुग्णालयात फक्त गंभीर रुग्णांना भरती केले जात असून, उर्वरित रुग्णांना रुग्णालयांतून साेडण्यात येत आहे. रुग्णालयात दररोज ६० ते ७० शस्त्रक्रिया केल्या जातात, परंतु सध्या आपत्कालीन परिस्थितीत येणाऱ्या रुग्णांवर शस्त्रक्रिया केल्या जात आहेत. या सर्व परिस्थितीवर महाराष्ट्र राज्य परिचारिका संघटनेच्या अध्यक्षा सुमित्रा तोटे म्हणाल्या, की मंगळवारी (ता. २१) परिचारिका संघटनेची वैद्यकीय शिक्षण मंत्र्यांसोबत बैठक झाली होती. दरम्यान, सरकारने त्यांच्या काही मागण्या पूर्ण करण्याचे आश्वासनही दिले आहे, परंतु ते लेखी स्वरूपात मिळेपर्यंत संप सुरूच राहील.
.........................
‘‘माझ्या खांद्याला दुखापत झाली आहे. मी गेल्या शनिवारपासून दाखल असून, डॉक्टरांनी सांगितले, की शस्त्रक्रिया शनिवारी होईल. नंतर त्यांनी सांगितले की सोमवारी होईल, परंतु अद्याप शस्त्रक्रिया झाली नाही. परिचारिकांची बैठक असल्याचे आम्हाला सांगण्यात आले. मला असह्य वेदना होत असून शस्त्रक्रिया कधी होणार?,’’ असा प्रश्न ऑर्थोपेडिक वॉर्डमध्ये दाखल असलेल्या अनिता श्रेष्ठा (५२) यांनी विचारला.