किनारी मार्गालगतच्या वाहनातळाप्रकरणी कारवाईचे आदेश

किनारी मार्गालगतच्या वाहनतळाप्रकरणी कारवाईचे आदेश
सकाळ वृत्तसेवा
मुंबई, ता. २३ : किनारी मार्गालगत वरळी, हाजी अली आणि ब्रीच कँडी परिसरातील मोकळ्या जागेत वाहनतळ उभारण्यास पालिकेच्या प्रस्तावाच्या पार्श्वभूमीवर केंद्रीय पर्यावरण, वन आणि हवामान बदल मंत्रालयाने महाराष्ट्र कोस्टल झोन मॅनेजमेंट प्राधिकरणाला चौकशी करण्याचे आदेश दिले आहेत.

मुंबई महापालिकेने किनारी मार्गालगत वरळी, हाजी अली आणि ब्रीच कँडी परिसरातील मोकळ्या जागेत वाहनतळ विकसित करण्याची घोषणा केली होती. त्यात काही ठिकाणी वाहनतळ विकसितही केली गेली. याबाबत वॉचडॉग फाउंडेशनने तक्रार दाखल केली होती. या फाउंडेशनचे प्रमुख गॉडफ्रे पिमेंटा यांनी सांगितले की, ‘किनारी मार्गालगत वाहनतळाचे काम २०१७ मध्ये दिलेल्या पर्यावरण मंजुरीच्या अटींचा भंग आहे. मंजुरीतील स्पष्ट अटीनुसार, ९० हेक्टर भराव असलेली जमीन कोणत्याही निवासी अथवा व्यावसायिक वापरासाठी वापरता येणार नाही.’ या तक्रारीनंतर मंत्रालयाने महाराष्ट्र महाराष्ट्र कोस्टल झोन मॅनेजमेंट प्राधिकरणाला व नागपूर येथील क्षेत्रीय कार्यालयाला प्रकरणाची चौकशी करून संबंधितांना उत्तर देण्यास सांगितले आहे. नियमभंग आढळल्यास कायदेशीर कारवाईचेही निर्देश देण्यात आल्याची माहिती गॉडफ्रे पिमेंटा यांनी दिली.