मुंबई विद्यापीठातील ८७ कर्मचाऱ्यांची सेवा नियमित

मुंबई विद्यापीठातील ८७ कर्मचाऱ्यांची सेवा नियमित

मुंबई, ता. २३ : मुंबई विद्यापीठातील अनुकंपा तत्त्वावर नियुक्त करण्यात आलेल्या ८७ शिक्षकेत्तर कर्मचाऱ्यांच्या सेवा आता नियमित करण्यात आल्या आहेत. या निर्णयास कार्योत्तर मान्यता देण्यात आल्याची माहिती उच्च व तंत्रशिक्षणमंत्री चंद्रकांत पाटील यांनी दिली.

मंत्री चंद्रकांत पाटील यांच्या अध्यक्षतेखाली मंत्रालयात बुधवारी (ता. २३) उच्च व तंत्रशिक्षण विभागाच्या आढावा बैठकीत ही माहिती देण्यात आली. या बैठकीस उच्च व तंत्रशिक्षण विभागाचे अपर मुख्य सचिव बी. वेणुगोपाल रेड्डी, उच्च शिक्षण संचालक डॉ. शैलेंद्र देवळाणकर, तंत्रशिक्षण विभागाचे संचालक डॉ. विनोद मोहितकर उपस्थित होते. या वेळी चंद्रकांत पाटील म्हणाले, मुख्यमंत्री देवेंद्र फडणवीस यांनी सर्व विभागांसाठी १५० दिवसांचा उद्दिष्टांचा कार्यक्रम निश्चित केला आहे. याअंतर्गत आकृतीबंध अद्ययावत करणे, नियुक्ती नियम सुधारित करणे आणि अनुकंपा तत्त्वावरील भरती १०० टक्के करण्यावर भर देण्यात आला आहे. याच पार्श्वभूमीवर मुंबई विद्यापीठातील अनुकंपा तत्त्वावरील अनेक वर्षांपासून प्रलंबित नियुक्त्यांचा आढावा घेऊन त्यासंदर्भात कालबद्ध नियोजनानंतर संबंधित कर्मचाऱ्यांच्या सेवा नियमित करण्यात आल्या आहेत. तसेच, सध्या रिक्त असलेल्या अनुकंपाच्या जागांचा पुन्हा आढावा घेऊन तातडीने उच्च व तंत्रशिक्षण विभागातील अशा सर्व रिक्त जागा १०० टक्के भरण्यात येणार आहेत.