मुंबईत दिवसभर पावसाचा जोर

मुंबईत दिवसभर पावसाचा जोर

सकाळ वृत्तसेवा
मुंबई, ता. २३ : सलग दुसऱ्या दिवशीही पावसाचा जोर कायम राहिला. त्यामुळे शहरात झाडे-फांद्या पडण्याच्या १९ तक्रारी, सहा शॉर्टसर्किट आणि चार घरांच्या भिंती पडण्याच्या तक्रारी प्राप्त झाल्या. कुठेही जीवितहानी झाली नाही. वाहतूक व्यवस्था सुरळीत असून, महापालिकेचे पथक सतर्क आहे, अशी माहिती पालिका प्रशासनाच्या वतीने देण्यात आली.
सकाळी ८ ते सायंकाळी ६ या वेळेत मुंबईत सांताक्रूझमध्ये ४२ मिमी, तर कुलाबा येथे २४.६ मिमी पाऊस झाला. महापालिकेच्या मोजणीनुसार, शहरात २८.५७ मिमी, पूर्व उपनगरात ३९.५० मिमी आणि पश्चिम उपनगरात ३५.०९ मिमी पावसाची नोंद झाली. मुंबईत सरासरी ३४.३९ मिमी पाऊस झाला. हवामान खात्याने पुढील २४ तासांसाठी ढगाळ वातावरण आणि काही ठिकाणी जोरदार सरींसह प्रतितास ४०-५० किमी वेगाने वारे वाहण्याची शक्यता वर्तवली आहे.