भांडुप खिंडीपाडा येथे दरड कोसळली

भांडुप खिंडीपाडा येथे दरड कोसळली
घरे रिकामी असल्याने मोठा धोका टळला
सकाळ वृत्तसेवा
मुंबई, २३ : गेल्या दोन-तीन दिवसांपासून संततधार पावसामुळे मंगळवारी (ता. २२) रात्री भांडुप खिंडीपाडा येथे दरड कोसळल्याची घटना घडली. या दरडीसोबत चार घरे तब्बल ५० फूट खाली कोसळली, तर बुधवारीही या ठिकाणी माती खचल्याने दोन घरे मातीसह खाली कोसळली. सुदैवाने ही घरे पावसापूर्वी रिकामी करण्यात आल्याने मोठा धोका टळला. या घटनेत कोणतीही जीवितहानी झाली नसल्याची माहिती पालिका प्रशासनाने दिली.
भांडुप पश्चिम येथील खिंडीपाडा परिसरात ओमेगा हायस्कूलमागे मंगळवारी रात्रीच्या सुमारास दरड कोसळली. सलग संततधार पावसामुळे या ठिकाणी डोंगर उतारावरील झोपड्यांना धोका निर्माण झाला आहे. त्यातच खिंडीपाडा येथे पावसामुळे जमीन भुसभुशीत होऊन संरक्षक भिंतीसह चार घरे खाली कोसळली. या घटनेची माहिती मिळताच अग्निशमन दल, पालिकेचे अधिकारी आणि स्थानिक पोलिसांनी घटनास्थळी धाव घेतली. खबरदारीचा उपाय म्हणून आजूबाजूच्या रहिवाशांना सुरक्षित स्थळी जाण्याचे आवाहन करण्यात आले, तर बुधवारीही माती खचल्याने दोन घरे मातीसोबत खाली आली, मात्र आधीच घरे रिकामी असल्याने मोठा धोका टळला.