रेल्वेतील नोकरीच्या प्रलोभनाने तरुण रस्त्यावर

रेल्वेतील नोकरीच्या
प्रलोभनाने तरुण रस्त्यावर
हातची नोकरी सोडली; १२ लाखांना गंडा
सकाळ वृत्तसेवा
मुंबई, ता. २३ ः रेल्वेतील चांगल्या पगाराच्या सरकारी नोकरीला लावतो, असे प्रलोभन दाखवत भांडुप येथील एका तरुणाला भामट्यांनी १२ लाखांचा गंडा घातला. इतकेच नव्हे, तरुणास सध्या करीत असलेली नोकरी सोडण्यास भाग पाडून त्याच्याकडून केंद्र सरकारच्या कर्मयोगी ॲपद्वारे रेल्वेशी संबंधित चार अभ्यासक्रमही करवून घेतले.
भरलेले पैसे आणि सरकारी नोकरी मिळणार नाही, आपली फसवणूक झाली आहे, याची जाणीव होताच या तरुणाने भांडुप पोलिस ठाण्यात तक्रार दिली. पोलिसांनी त्या आधारे विक्रांत राणे, अश्विनी राणे आणि प्रथमेश लाड या भामट्यांविरोधात गुन्हा नोंदवला. या तिघांनी अशा पद्धतीने पूर्व उपनगरातील अनेक तरुणांना फसविल्याची प्राथमिक माहिती पोलिसांना मिळाली आहे. तक्रारदार तरुण एका बहुराष्ट्रीय कंपनीत नोकरी करीत होता. आरोपी राणे दाम्पत्य त्याच्याशेजारी भाड्याने राहण्यास आले. स्वतःला रेल्वे अधिकारी असल्याचे भासवत आरोपी विक्रांतने २०२२ मध्ये तरुणाला विश्वासात घेतले. रेल्वेत नोकरी मिळवून देतो, असे सांगत १२ लाख रुपये उकळले.
----
घराच्या कर्जाचे हप्ते थकले!
सर्वप्रथम आरोपींनी मला माझी नोकरी सोडण्यास सांगितले. मी तयार नव्हतो; परंतु १२ लाख दिल्याने त्यांच्यावर विश्वास ठेवण्याशिवाय माझ्याकडे पर्याय नव्हता. पुढे कर्मयोगी ॲप्लिकेशनद्वारे चार कोर्स करवून घेतले. गेल्यावर्षी ते पूर्ण झाल्यावर चार ते पाच दिवसांत नियुक्तिपत्र मिळेल, असे सांगून राणे दाम्पत्य पसार झाले. १२ लाख गेलेच; पण हातची नोकरी सोडल्याने तब्बल दोन वर्षे बेरोजगार राहिलो. या काळात पगारापोटी मिळणारे १५ ते १६ लाख रुपयेही गेले. एकुलता एक असल्याने कुटुंबाचा सर्व भार माझ्यावर होता. घरासाठी काढलेल्या कर्जाचे हप्तेही डोक्यावर होते, अशी आपबिती तक्रारदार तरुणाने ‘सकाळ’कडे व्यक्त केली.