‘जेजे’तील डॉक्टरांचे आंदोलन स्थगित

‘जेजे’तील डॉक्टरांचे आंदोलन स्थगित

सकाळ वृत्तसेवा
मुंबई, ता. २४ : जे. जे. रुग्णालयातील बालरोग विभागप्रमुख विद्यार्थिनीचा मानसिक छळ करून त्रास देत असल्याचा आरोप करीत बालरोग विभागातील निवासी डॉक्टरांनी विभागप्रमुखांना पदावरून हटविण्याची मागणी करीत शनिवारपासून काम बंद आंदोलन सुरू केले होते. या विद्यार्थ्यांची मागणी अद्याप पूर्ण झालेली नाही, तरीही रुग्णांचे हाल होऊ नये यासाठी आंदोलन तात्पुरते स्थगित करण्यात आले आहे.
मार्ड संघटनेच्या वतीने ३० जुलैपर्यंत याबाबत निर्णय न झाल्यास काम बंद आंदोलन करण्यात येणार आहे. या काळात निवासी डॉक्टर काळ्या फिती लावून काम करणार आहेत. अंतिम वर्षाच्या निवासी डॉक्टरने १६ जुलैला झोपेच्या गोळ्या घेत आत्महत्येचा प्रयत्न केला. या डॉक्टरने आत्महत्येचा प्रयत्न करण्यापूर्वी लिहिलेल्या पत्रात बालरोग विभागाच्या प्रमुखांचे नाव लिहिले आहे. तसेच अन्य विद्यार्थ्यांनाही विभागप्रमुखांकडून त्रास होत असल्याने निवासी डाॅक्टराकडून काम बंद आंदोलन केले आहे. याप्रकरणी वैद्यकीय शिक्षणमंत्री हसन मुश्रीफ यांची भेट घेतली. या वेळी जे. जे. रुग्णालयातील बालरोग विभागप्रमुखांना सक्तीच्या रजेवर पाठविण्याच्या सूचना मंत्री मुश्रीफ यांनी दिल्या आहेत. तसेच या घटनेबाबत चौकशी करण्यासाठी दोन समित्या नेमण्यात आल्या आहेत. या समितीचा अहवाल प्राप्त झाल्यानंतर निर्णय घेण्यात येईल, असे सांगण्यात आले.