गणेशोत्सवात चाकरमान्यांना दिलासा एकेरी गट आरक्षणावरील ३० टक्के भाडेवाढ रद्द

गणेशोत्सवात चाकरमान्यांना दिलासा
एकेरी गट आरक्षणावरील ३० टक्के भाडेवाढ रद्द
प्रवासी संघटनेचे आंदोलन मागे
मुंबई, ता २४ : गौरी-गणपती सणासाठी सामूहिक पद्धतीने आपल्या गावाला जाणाऱ्या गणेशभक्तांसाठी एसटी महामंडळाने ३० टक्के प्रवासी भाडेवाढ केली होती. त्यावर गणेशभक्त कोकणवासीय प्रवासी संघाच्या वतीने आंदोलनाचा इशारा दिला होता. अखेर परिवहन मंत्री तथा एसटी महामंडळाचे अध्यक्ष प्रताप सरनाईक यांनी ३० टक्के भाडेवाढ मागे घेतली आहे.
महाराष्ट्रातील सर्वसामान्य जनतेला फायद्या-तोट्याचा विचार न करता दैनंदिन प्रवासाबरोबरच महत्त्वाच्या सणांसाठी एसटी सेवा वेळेवर उपलब्ध करून दिली जाते. विशेषतः गणपती उत्सव, आषाढी, होळी यासाठी प्रवाशांच्या मागणीनुसार गट आरक्षणाकरिता मोठ्या प्रमाणात एसटी बसेस उपलब्ध करून दिल्या जातात. यंदाही चाकरमानी-प्रवाशांच्या मागणीनुसार तब्बल पाच हजार जादा एसटी बसेस गणपती उत्सवासाठी सोडण्याचे नियोजन एसटीने केले असून, त्यामध्ये शासनाने दिलेल्या अमृत ज्येष्ठ नागरिक, ज्येष्ठ नागरिक आणि महिलांसाठी असलेल्या सर्व सवलती लागू आहेत.
................
‘प्रवाशांनी एकेरी आरक्षण केल्याने परतीच्या प्रवासात एसटी बस रिकाम्या आणाव्या लागतात. ह्यामुळे महामंडळाला आर्थिक फटका बसत असताे. सणांसाठी राज्यभरातील इतर ठिकाणांहून बसेस एकत्रित करून प्रवाशांना उपलब्ध करून दिल्या जातात. यामुळे स्थानिक पातळीवर बसेसची कमतरता निर्माण हाेऊन हा तोटा आणखीन वाढला जाऊ शकतो. तोटा कमी करण्यासाठी प्रवाशांच्या तिकिटावर ३० टक्के भाडेवाढ करण्याचा निर्णय महामंडळाने नाइलाजाने घेतला होता. परंतु उपमुख्यमंत्री शिंदे यांच्या सूचनेनुसार मराठी चाकरमान्यांच्या भावना लक्षात घेता आरक्षणावरील ३० टक्के भाडेवाढ रद्द करण्यात येत आहे.’
- प्रताप सरनाईक, परिवहन मंत्री
............
‘गौरी-गणपतीसाठी सामूहिक पद्धतीने गावाला जाणाऱ्या गणेशभक्तांसाठी महामंडळाने ३० टक्के भाडेवाढ केली होती. त्याचा निषेध करण्यासाठी गणेशभक्त कोकणवासीय प्रवासी संघाच्या वतीने करण्यात आला. मात्र भाडेवाढ मागे घेतल्याने आता विजयी मेळावा साजरा केला जाणार आहे.’
- दीपक चव्हाण, कार्याध्यक्ष, गणेशभक्त कोकणवासीय प्रवासी संघ