मुंबई विद्यापीठात आता हवामानविषयक अभ्यासक्रम

मुंबई विद्यापीठात आता
हवामानविषयक अभ्यासक्रम
लखनौच्या ‘बर्ड’सोबत सामंजस्य करार
मुंबई, ता. २५ : मुंबई विद्यापीठाच्या १०० वर्षांहून अधिक जुन्या मुंबई स्कूल ऑफ इकॉनॉमिक्स अँड पब्लिक पॉलिसी येथील डॉ. एस. ए. दवे सेंटर फॉर रिसर्च अँड टीचिंग इन फायनान्सच्या माध्यमातून विद्यार्थ्यांना हवामान बदल, हवामान वित्त आणि शाश्वत विकासाचे धडे गिरवता येणार आहे. याबाबत प्रशिक्षण कार्यक्रम, प्रमाणपत्र आणि डिप्लोमा अभ्यासक्रम विकसित करण्यासाठी लखनौच्या बँकर्स इन्स्टिट्यूट ऑफ रूरल डेव्हलपमेंटसोबत (बर्ड) सामंजस्य करार करण्यात आला.
कराराच्या अनुषंगाने बँकर्स इन्स्टिट्यूट ऑफ रूरल डेव्हलपमेंट संस्थेमार्फत हवामान वित्ताच्या विशिष्ट क्षेत्रातील प्रमाणपत्र अभ्यासक्रम विद्यार्थ्यांना उपलब्ध करून दिले जाणार आहे. तसेच विद्यार्थ्यांना ‘बर्ड’मध्ये इंटर्नशिप करण्याची संधी मिळणार आहे. वेळोवेळी या क्षेत्रातील प्रगत अभ्यास, संशोधन, परिसंवाद आणि परिषदांचे आयोजन करण्यात येईल. याप्रसंगी मुंबई विद्यापीठाचे कुलगुरू प्रा. रवींद्र कुलकर्णी, प्र. कुलगुरू प्राचार्य अजय भामरे, बँकर्स इन्स्टिट्यूट ऑफ रूरल डेव्हलपमेंटचे संचालक आणि विभागाचे माजी विद्यार्थी डॉ. निरुपम मेहरोत्रा, विभागाच्या संचालिका प्रा. मनीषा करने, दवे सेंटरच्या समन्वयक डॉ. माला लालवाणी आदी उपस्थित होते.
---
शाश्वत विकासासाठी योगदान
क्लायमेट फायनान्स हे केवळ भविष्यातील गरज नसून, सध्याचे एक अपरिहार्य क्षेत्र बनले आहे. या अभ्यासक्रमाच्या माध्यमातून विद्यार्थी जागतिक हवामान बदलाच्या आव्हानांना तोंड देण्यासाठी तयार होतील, तसेच देशाच्या शाश्वत विकासासाठी योगदान देऊ शकतील, असे मत मुंबई विद्यापीठाचे कुलगुरू प्रा. रवींद्र कुलकर्णी यांनी मांडले.