‘सीएसएमटी’, विमानतळावर बॉम्बची अफवा

‘सीएसएमटी’, विमानतळावर बॉम्बची अफवा

मुंबई, ता. २६ : छत्रपती शिवाजी महाराज टर्मिनस आणि छत्रपती शिवाजी महाराज आंतरराष्ट्रीय विमानतळ येथे बॉम्ब पेरल्याची माहिती देणारे दूरध्वनी शुक्रवारी (ता. २५) पोलिस नियंत्रण कक्षांना प्राप्त झाले; मात्र ही अफवा असल्याचे स्पष्ट होताच सर्वच यंत्रणांचा जीव भांड्यात पडला. पोलिसांनी दिलेल्या माहितीनुसार शुक्रवारी दुपारी मुंबई पोलिस आयुक्तालयातील नियंत्रण कक्षात अनोळखी व्यक्तीने संपर्क साधून विमानतळाच्या टर्मिनल २ येथे बॉम्ब ठेवल्याचे सांगितले. त्याच सुमारास राज्य पोलिस मुख्यालयाच्या नियंत्रण कक्षाला सीएसएमटी येथे बॉम्ब पेरल्याची माहिती दिली. दोन्ही नियंत्रण कक्षांनी ही माहिती तातडीने पोलिस, राज्य दहशतवादविरोधी पथक, बॉम्बशोधक व नाशक पथकास कळवली. या दोन्ही ठिकाणांची झाडाझडती घेतली असता कोणतीही संशयास्पद वस्तू आढळली नाही. त्यामुळे या अफवा असल्याचे स्पष्ट झाले. दरम्यान, याप्रकरणी अज्ञात व्यक्तींविरोधात गुन्हा नोंदवण्यात आल्याचे पोलिसांनी सांगितले.