ऐरोली खडीपुलावर उभ्या ट्रकला धडकून दुचाकीस्वाराचा मृत्यू

ऐरोली खडीपुलावर उभ्या ट्रकला धडकून दुचाकीस्वाराचा मृत्यू
ट्रक चालकाविरोधात गुन्हा

मुंबई, ता. २६ : ऐरोली खाडीपुलावर उभ्या ट्रकला धडकून दुचाकीवरून प्रवास करणाऱ्या लक्ष्मण पाटील (वय ४०) यांचा मृत्यू झाला. हा अपघात शुक्रवारी (ता. २५) सकाळी साडेसात वाजण्याच्या सुमारास घडला. याप्रकरणी नवघर पोलिसांनी ट्रकचालक रवींद्र राजोळे (२७) याच्याविरोधात गुन्हा नोंदवला आहे.

पोलिसांनी दिलेल्या माहितीनुसार, दुचाकीस्वार लक्ष्मण पाटील यांना पुलावर उभ्या ट्रकचा अंदाज नव्हता. यामुळे त्यांची दुचाकी वेगात ट्रकला मागील बाजूस धडकली. त्यामुळे त्यांना डोके आणि छातीला गंभीर दुखापत झाली. त्यांना प्रथम मुलुंडच्या वीर सावरकर रुग्णालयात दाखल करण्यात आले; मात्र तेथे व्यवस्था नसल्याने डॉक्टरांनी पाटील यांना तातडीने घाटकोपरच्या राजावाडी रुग्णालयात नेण्याचा सल्ला दिला. कुटुंबीयांच्या सूचनेवरून अखेर पाटील यांना फोर्टिस रुग्णालयात दाखल केले. मात्र उपचारांदरम्यान दुपारी एकच्या सुमारास त्यांचा मृत्यू झाला. पुलावर ट्रक उभा केल्यास अपघात घडू शकतो, वाहतुकीस अडथळा निर्माण होऊ शकतो याची जाणीव आरोपी चालकाला होती, तरीही त्याने ही कृती केली. शिवाय ट्रक उभा आहे हे अन्य वाहनचालकांना कळावे, यासाठी आवश्यक असलेली उपाययोजना आरोपीने केली नाही, असे पोलिसांनी सांगितले.