नेत्रहीन गोविंदा पथकाचा सरावाचा उत्साह

दिव्यांग गोविंदा पथकाचा सराव
सकाळ वृत्तसेवा
मुंबई, ता. २९ : मुंबईत दहीहंडीचा सराव सुरू झाला आहे. यात नेत्रहीन गोविंदा पथकांनी सराव सुरू केला आहे. माटुंगा पूर्व येथील वीर मेजर रमेश दादकर मैदानात दररोज संध्याकाळी एक वेगळीच उत्साही गर्दी पाहायला मिळते. नयन आणि आधारिका फाउंडेशनच्या मार्गदर्शनाखाली नेत्रहीन मुला-मुलींचे ‘गोविंदा पथक’ आपल्या खास पद्धतीने सराव करत आहे. पाहणाऱ्यांना थक्क करणारी ही बाब म्हणजे हे सर्व विद्यार्थी नेत्रहीन असूनसुद्धा दहीहंडीचा दिवसरात्र सराव करतात.

प्रत्येक वर्षी गोविंदाच्या उत्सवापूर्वी एक महिना या मुलांचे पथक सायंकाळी सराव करत आहे. ‘आम्ही पाहू शकत नाही, पण आमचा उत्साह खूप मोठा आहे. आम्ही कोणत्याही सामान्य गोविंदा पथकासारखेच हे कार्य करू शकतो, असं या पथकातील एका सहभागी गोविंदाने सांगितले. सर्व सहभागी ठाणे, पनवेल, बदलापूर, कर्जत, कसारा इत्यादी ठिकाणाहून येतात. अनेक सहभागी विद्यार्थी अत्यंत हलाखीच्या पार्श्वभूमीतील आहेत. आर्थिकदृष्ट्या मागासलेल्या घरांतील या मुला-मुलींमध्ये जिद्द, जोश आणि एकमेकांना मदतीचा हात देण्याची तयारी नेहमी पाहायला मिळते.

गोविंदा पथकाच्या उपक्रमातून आपल्याला एक मोठा संदेश मिळतो की, कोणतीही अडचण ही कधीच यशासाठी अडथळा ठरू शकत नाही. प्रत्येकाने स्वतःच्या मर्यादांवर मात करून कष्ट, सराव आणि जिद्दीच्या जोरावर मोठे स्वप्न पाहावं, हे नेत्रहीन गोविंदा पथक सिद्ध करत आहे. त्यांचा हसरा चेहरा, प्रत्येक सरावातील उत्साह आणि ‘आम्ही ही दहीहंडी उत्सव साजरा करू शकतो,’ हा संदेश प्रत्येकाला नक्कीच भारावून टाकतो, असे आधारिका फाउंडेशनचे संस्थापक आणि संचालक विनायक मोरे यांनी सांगितले.