शिवमंदिरात भाविकांची गर्दी

शिवमंदिरात भाविकांची गर्दी
सकाळ वृत्तसेवा
मुंबई, ता. २८ : पहिल्या श्रावणी सोमवारनिमित्त मुंबईतील बाबुलनाथ मंदिरात भाविकांची मोठी गर्दी झाली होती. हिंदू धर्म दिनदर्शिकेनुसार श्रावण महिन्याची सुरुवात झाली असून, श्रावण महिन्यातील पहिला सोमवार शुभ मानला जातो. याच पार्श्वभूमीवर बाबुलनाथ मंदिरात मोठ्या प्रमाणात भाविक उपस्थित होते. मंदिरात फुलांची आरास केली आहे.
भाविकांकडून जलाभिषेक आणि रुद्राभिषेक केला. महादेवाच्या नावाचा ‘हर हर महादेव’ असा जयघोष संपूर्ण मंदिरात सतत चालू होता. सकाळपासूनच मंदिरात जलाभिषेक करायला सुरुवात झाली होती. मुंबई आणि मुंबईबाहेरील भाविकांनी बाबुलनाथ मंदिरात गर्दी केली होती. श्रावण शिवरात्रीला भाविकांचा उत्साह शिगेला पोहोचला होता. बाबुलनाथ मंदिरात रुद्राभिषेक आणि दुग्धाभिषेक केला गेला. दक्षिण मुंबईतील एका टेकडीवर वसलेले हे मंदिर सुमारे ३०० वर्षे जुने आहे. श्रावण सोमवार आणि शिवरात्रीच्या विशेष प्रसंगी मंदिरात विशेष व्यवस्था केली आहे.
बाबुलनाथ मंदिर सकाळी ४ वाजता खुले करण्यात आले. रात्री १० वाजता मंदिर बंद केले जात आहे. सकाळची पहिली आरती ४.३० वाजता झाली. त्यानंतर दिवसभरात तीनदा आरती केली गेली. दिवसभर जवळपास ६० ते ७० हजार भक्तांनी देवाचे दर्शन घेतले. कमीत कमी दीड तास दर्शनासाठी लागत होता, असे भाविक प्रशांत पांजरी यांनी सांगितले.  २०० पोलिसांचा फौजफाटा असून, १८० सुरक्षा रक्षक तैनात करण्यात आले आहे. तसेच ६० सीसीटीव्ही कॅमेरे बसवले आहेत. एक रुग्णवाहिका, शिवाय बाजूच्या एका रुग्णालयात आपत्कालीन परिस्थितीत रुग्णाला पाठवले जाते. दोन डॉक्टर, दोन परिचारिका, पाच इतर कर्मचारीही मदतीला आहेत, असे बाबुलनाथ मंदिराचे व्यवस्थापक मुकेश कनोजिया यांनी सांगितले.