२५ टक्के एचआयव्हीग्रस्तांना रक्तदाब

२५ टक्के एचआयव्हीग्रस्तांना रक्तदाब
नियमित चाचणी आणि त्वरित उपचारांची आवश्यकता
भाग्यश्री भुवड ः सकाळ वृत्तसेवा
मुंबई, ता. २८ : एचआयव्हीसारख्या गंभीर आजाराने त्रस्त असलेल्या २५ टक्के रुग्णांना उच्च रक्तदाब आहे. त्यातही ५६.७ टक्के रुग्ण आरोग्यविषयक समस्येबाबत अनभिज्ञ असल्याचे मुंबईच्या अँटीरेट्रोव्हायरल थेरपी (एआरटी) सेंटरमधील रुग्णांच्या अभ्यासातून समोर आले आहे. याशिवाय एचआयव्हीग्रस्तांमध्ये अससंर्गजन्य आजारांचे वाढते प्रमाण लक्षात घेता, नियमित चाचणी आणि त्वरित उपचार आवश्यक असल्याचे तज्ज्ञांचे म्हणणे आहे.
उच्च रक्तदाबामुळे रुग्णांच्या आरोग्यावर गंभीर परिणाम होतो. त्यांना हृदयरोग, पक्षाघात, किडनीविकार, नेत्रविकार तसेच मेंदूशी संबंधित आजारांना सामोरे जावे लागते. एकूण लोकसंख्येपैकी २४ टक्के नागरिकांना उच्च रक्तदाब आहे. या पार्श्वभूमीवर एचआयव्ही रुग्णांमधील उच्च रक्तदाबाचे प्रमाण जाणून घेण्यासाठी मुंबई जिल्हा एड्स नियंत्रण सोसायटीच्या तत्कालीन अतिरिक्त प्रकल्प संचालक डॉ. श्रीकला आचार्य यांनी यासंदर्भात अभ्यास केला.
----
कसा झाला अभ्यास?
तपासण्यात आलेली एआरटी केंद्रे - २१
एचआयव्हीग्रस्तांची तपासणी - ३६,०९८
उच्च रक्तदाबग्रस्त रुग्ण - ८६०४ (२३.८%)
रक्तदाब असल्याबाबत अनभिज्ञ - ५६.७%
.....
एचआयव्हीग्रस्तांमध्ये उच्च रक्तदाबासारख्या असंसर्गजन्य आजारांचा माहिती मिळाली. त्यानुसार त्यांना एआरटी केंद्रातच एचआयव्ही औषधांसह रक्तदाबाच्या गोळ्या देण्यास सुरुवात केली.
- डॉ. श्रीकला आचार्य, तत्कालीन अतिरिक्त प्रकल्प संचालक, मुंबई जिल्हा एड्स नियंत्रण सोसायटी
.......