चकमकफेम दया नायक एसीपी

चकमकफेम दया नायक एसीपी
मुंबई, ता. २९ : चकमकफेम अशी ओळख असलेले गुन्हे शाखेचे वरिष्ठ पोलिस निरीक्षक दयानंद नायक यांना मंगळवारी गृह विभागाने सहाय्यक आयुक्तपदी (एसीपी) बढती दिली. ते ३१ जुलै रोजी सेवानिवृत्त होत आहेत.
नायक यांनी आपल्या सेवाकाळात ८७ एन्काउंटर केले. त्यात लष्कर-ए-तैयबाच्या तीन संशयित अतिरेक्यांसह दाऊद, छोटा राजनसह सर्वच संघटित गुन्हेगारी टोळ्यांतील गँगस्टरचा समावेश आहे. त्यांनी विविध गुन्ह्यांची उकल करताना हजारहून अधिक गुन्हेगारांना अटक केली असून, मोठ्या प्रमाणावर अद्ययावत शस्त्रसाठा हस्तगत करण्यात यश मिळवले. सेवाकाळाच्या उत्तरार्धात त्यांनी अमली पदार्थांचे कारखाने उद्ध्वस्त केले. अभिनेता सलमान खान याच्या निवासस्थानी कुख्यात लॉरेन्स बिश्नोई टोळीने केलेल्या गोळीबाराचा तपासही त्यांनी केला.