एसटी महामंडळाचे १२ कोटी वाचणार

एसटी महामंडळाचे १२ कोटी वाचणार

उद्यापासून तेल कंपन्यांची ३० पैसे वाढीव सवलत

सकाळ वृत्तसेवा
मुंबई, ता. ३० : डिझेल इंधनावर शुक्रवारपासून वाढीव ३० पैशांची सवलत देण्याचा निर्णय इंडियन ऑइल आणि भारत पेट्रोलियम या कंपन्यांनी घेतल्याने एसटी मंडळाची वर्षाला सुमारे ११ कोटी २० लाखांची बचत होणार आहे. आर्थिक संकटात असलेल्या एसटी सेवेला मोठा दिलासा मिळणार आहे. परिवहनमंत्री तथा एसटी महामंडळाचे अध्यक्ष प्रताप सरनाईक यांचा व्यावसायिक दृष्टिकोन आणि कणखर भूमिकेमुळे हे शक्य झाले आहे.

७० वर्षांहून अधिक काळापासून एसटी महामंडळ इंडियन ऑइल आणि भारत पेट्रोलियम या सार्वजनिक क्षेत्रातील कंपन्यांकडून डिझेल खरेदी करीत आहे. एसटीला दररोज सरासरी १० लाख ७७ हजार लिटर डिझेल लागते. एसटी महामंडळाला या कंपन्या सवलतीच्या दरात हे इंधन पुरवतात; मात्र महामंडळाने वारंवार विनंती करूनही कित्येक वर्षे या कंपन्यांनी सवलत दरात बदल केला नव्हता. परिवहनमंत्री तथा एसटी महामंडळाचे अध्यक्ष प्रताप सरनाईक यांनी याबाबत सातत्याने पाठपुरावा केल्यामुळे संबंधित कंपन्यांनी सवलत दरात वाढ करण्याची भूमिका घेतली. त्यासाठी इंडियन ऑइल आणि भारत पेट्रोलियम या कंपन्यांच्या वरिष्ठ अधिकाऱ्यांसोबत मंत्री सरनाईक यांच्या अध्यक्षतेखाली मंत्रालयात तीन-चार बैठका घेण्यात आल्या. तसेच डिझेल पुरवठा करणाऱ्या इतर खासगी कंपन्यांसोबतदेखील वाटाघाटी करण्यात आल्या. स्पर्धात्मक स्तरावर निविदा काढण्याची प्रक्रियादेखील राबवण्याची तयारी ठेवली. अखेर या कंपन्यांनी सवलत दरात वाढ करण्याची तयारी दर्शविली. सध्या बाजारभावापेक्षा २.७० रुपयांची सवलत मिळत होती. ती तीन रुपयांपर्यंत वाढवण्यात आली आहे.
===
ठळक मुद्दे
- २५१ आगारांत पेट्रोलपंप
- १०,७८,००० लिटर दररोज डिझेल पुरवठा
- ३,२३,००० रुपये नव्‍या दरामुळे रोजची बचत
- ३,६०० कोटी सध्याचा वार्षिक खर्च
-----------------
एसटी महामंडळाची आर्थिक स्थिती अत्यंत नाजूक आहे. त्यामुळे शक्य तिथे बचत आणि काटकसर आवश्‍यक आहे. तिकीटविक्रीच्या व्यतिरिक्त उत्पन्नाचे इतर स्रोत निर्माण करण्याचे प्रयत्न आहेत. यामुळे भविष्यात एसटी महामंडळ आर्थिकदृष्ट्या सक्षम होईल.
- प्रताप सरनाईक, परिवहनमंत्री तथा अध्यक्ष एसटी महामंडळ